كلكم سعد المجرد

خير اللهم اجعله خير،

بفتح تويتر الصبح، الاقي خبر ان سعد المجرد اتقبض عليه في فرنسا ومتهم بالشروع في الاعتداء الجنسي علي فتاة!

ايه؟؟

يالهوي؟؟؟؟

سعد المجرد، ليه؟ ليه كل الحاجات الحلوة في حياتنا بتتدمر :(

طيب، ما علينا! بالنسبة لي كان الموضوع عادي، المطرب الاكثر شهرة في المغرب العربي حالياً متهم بتهمة مخلة، مش جديدة، عامة تاريخ لاعبي كرة القدم المغاربة (من تونس والجزاير والمغرب) فيه كتير حالات اعتداء جنسي.

السؤال اللي شغل ذهني شخصياً وان لم اجرؤ علي مشاركته، وشغل مستخدمي سوشيال ميديا كتير هو:

هذا الشاب الوسيم جداً قوي يعني، اللي كل بنات العرب من المحيط للخليج هيموتوا عليه، ساب كل دول ومتهم بالاغتصاب!! ليه؟

انا كبومة عتيدة كان ليا تخيل عن الموضوع، إن الموضوع غالباً هيبقي ان فيه واحدة راحت معاه برضاها، وبعد كده قررت انها مش عاوزة تكمل، فغالباً اتغابي عليها وقرر انه يتعامل بشكل عنيف تم تصنيفه علي انه اغتصاب.

لحد كده والموضوع عادي، بسمع اخبار عن (اطلاق سراحه، لا لسه شوية، لا طالع بكفالة)، لحد ما شوفت الكبيرة!

ان المغني المشهور سبق واتوجه له تهمة الشروع في الاغتصاب في الولايات المتحدة، وقدر يهرب قبل ما يتحال للمحاكمة!!

اللهم صلي عالنبي، دي احلوت قوي! يعني كمان سوابق يا سعد!

لما بات من الواضح ان الموضوع مش هيعدي، وإن الادعاء الفرنسي مش هيفرج عن سعد المجرد، بسبب تقرير الطب الشرعي اللي اثبت اثار للضرب في جسم البنت وكمان اثار للمخدرات والكحول في دم المجرد، اطلق مستخدموا تويتر هاشتاج اسمه #كلنا_سعد_المجرد!

الهاشتاج اللي عليه نسبة لا بأس بيها ابداً من الفتيات بيدعوا ربنا يفك كرب سعد، وينصره وينصفه، وبيستنكروا ازاي المومس الحقيرة بعد ما راحت معاه (بمزاجها) تقول ده حاول يغتصبني! ازاي؟ هي مش راحت بمزاجها! جايه تستهبل بنت ال.... وتتهمه بالاعتداء!

طيب، سيبونا شوية من قضية المجرد اللي مش فارق معايا هيحصل فيها ايه، وخلينا نركز شويه مع معجبات السيد (سعد المجرد).

البنات شايفين، انه طالما راحت معاه بمزاجها، يبقي تستاهل يتعمل فيها ومش من حقها تعترض!

ده المنطق اللي بيحرك البنات عالهاشتاج، معجبات سعد!

طيب، بعد ما ههرش شعري شوية، وابص للسقف، هقول: طيب.

يعني انا اتعرفت علي واحد، والشيطان سرح بيا (بالمنطق المحافظ) وروحت معاه البيت، وبعد ما الشيطان سرح بيا، اصابتني نوبة فوقان، وقررت اني مش هنجرف للرذيلة، ومش هعمل حاجه، هل من حقه يضربني ويجبرني وانا اوافق لاني من الاول روحت معاه بمزاجي، وبالتالي مش من حقي اني اقول انه اغتصاب؟

بلاش دي،

هو لو واحده وواحد طلعوا مع بعض الاوضة، هم المفروض طالعين يعملوا مع بعض حاجه، صح؟

طيب لو طرف فيهم قرر انه عاوز يلعب لوحده، يعني يفرض قواعده (ممارسة عنيفة او شاذة مثلاً)، ايه المفروض يكون موقف الطرف التاني لو الشكل ده مش مناسب ليه؟ المفروض يرضخ لاني من الاول طلعت بمزاجي؟

طبعاً انا من الاول مش عاوز اجادل في فرضية ان الجنس فعل رضائي، وبالتالي لو طرف راجل او ست قرر انه مش عاوز يكمل في الdeal ، يبقي كده فرضية الرضائية انتفت واي فعل هييجي بعدها هيتصنف انه اغتصاب!

طبعاً انا من الاول مش عاوزة اقول انه حتي لو عاملة جنس (مومس بالبلدي) طلعت مع زبون، وبعد ما طلعت معاه قررت انها مش هتمارس معاه جنس، لو انه لمسها فده هيعتبر قدام القانون اغتصاب.

طبعاً انا بحاول ابعد عن الفرضيات اللي هاخد فيها جهد علشان اوصل المنطق بتاعها للبني ادمين، فعلشان كده بتكلم في حاجه قريبة من تفكيرهم!

بمنطق البنات اللي زعلانين علي سعد عالهاشتاج، مش من حق البنت تشتكيه طالما طلعت معاه الاوضه! هنستعبط بقي، مش من الاول انتي اللي جيتي بمزاجك!

منطق الهاشتاج ده لو قاله راجل، انا قطعاً هتهمه بالرجعية والحيوانية والتخلف وكل التهم الفيمنستية الجميلة بتاعتي، بس ان بنت تتكلم بالمنطق ده، يبقي سيبوني اهرش في راسي لحد ما شعري يقع!!

البنت اللي بتفكر بالمنطق ده، ياتري هيبقي موقفها ايه لو ركبت عربية مع صاحبها او حبيبها او اي دكر في حياتها، واتحرش بيها او هاجمها واتعدي عليها، ياتري برضه هتقول: اصل انا اللي روحت معاه بمزاجي؟

يعني ارتباطي بواحد بمزاجي بيعني ان من حقه انه يحاول يستغلني او يتعدي عليا؟ ما انا اعرفه بمزاجي!

يعني الرضا بوجود علاقه يبرر ان الاعتداء يدخل كطرف في المعادلة!

هو مزاجي ده بيسمح بايه وميسمحش بايه؟

هو ايه رأي حضرتك عزيزتي الفتاه في ان جوزك ينام معاكي غصبن عنك؟ ماهو جوزك بقي ومش من حقك تعترضي، ياتري لو عمل كده قوليلي بقي ليه هتكرهي حياتك وتضربي عيالك وتفكري في الانتحار وتفضفضي مع الجيران وعلي صفحات الشات ومش بعيد تعرفي راجل تاني غيره!

هو وجودي في المجال العام (بمزاجي) يبرر اني اتعرض للانتهاك او الاعتداء؟ ما انا اللي موجودة بمزاجي!

ان يتعمل هاشتاج اسمه #كلنا_سعد_المجرد للتضامن مع مغني متهم بالاعتداء الجنسي والناس تبرر علشان البنت رايحة بمزاجها، واللي يتبني الاتجاه ده عدد لا بأس بيه من البنات هو أمر يدفع للتفكير العميق في جدوي كل الشغل اللي بنشتغله علي حماية الفتيات من الاعتداء وفيه بنات اصلاً مش شايفة ان اللي بيحصل ده اعتداء، او ان دي مسئولية البنت اصلاً،

بنفس منطق البنات اللي بتقول (اصل لبس البنت هو سبب التحرش)!

تعرفوا، فعلا انتم معاكم حق،

كلكم سعد المجرد، طول ما انتم موجودين هيفضل المنطق ده عايش.

سعد المجرد طلع فكرة، والفكرة طلع ليها انصار كتير. بالشفا علي قلبكم.

يلا، اشوفكم في جلسات الفضفضة اللي هتحضروها لما تتعرضوا للاعتداء الزوجي والتحرش من الرجالة اللي انتم

(روحتوا معاهم، بمزاجكم)!

قواعد الفليرتيشن الاربعون: كيف تشقط ذكر/ انثي في عدد محدود من الخطوات

استكمالا للتدوينة بتاعة محاولة لفهم السلوك الانساني المعقد، للي وصلنا فيها لنتيجة مفادها ان كل الناس بتشقط كل الناس بشكل يضايق كل الناس، احب استكمل معاكم الحوار باني اكمل كلامي عن قواعد الشقط الاربعون، دول اللي هم في الاخر صفصفوا علي عشرين بس.  

من الواضح ان اغلب محاولات الشقط بتتم بنفس الالية والتكنيك وان كانت خطوة بتسبق خطوة، خطوة بتيجي بعد خطوة، الشكل بيتغير بس المضمون واحد.

احب الفت انتباه جمهوري البائس، ان فيه حاجات كتير بتجذب البني ادمين في بعض، مش من ضمنها شكل الجسم او الملامح، او السهوكة/ الرجولة، الرقة/ قوة الشخصية،  من اكتر الحاجات اللي بتبقي جاذبة لمحاولات استكشاف هو ان الشخص او الشخصة يكونوا من فئة الكائنات الفضائية، يعني غرباء الاطوار، يعني: انت ايه بالضبط.

بالنسبة ان ابو الهول دائماً عنده اسرار، الشخص اللي بيعصي علي التصنيف داخل قالب محدد هو شخص دايماً مستهدف، مهما كان ودود او مهذب، هتلاقي ناس بتحاول تنكشك علشان تعرف اللي جواك. دول احسن حل معاهم هو انك متوصلهمش للي جواك ابداً، دايماً ابعته عالمتاهه، افضل طلعه من طبقة لطبقة واديه دايماً اللي يشتت معلوماته!

ده ازاي: ممممممممممم، انت وشوقك بقي.

تهدف هذه التدوينة الي تقديم بعض  الخطوات اللي لاحظتها وحكالي عنها الرفاق من خلال التجارب الناجحة والفاشلة، الخطوات دي بيعملها الصياد وبيحاول يجتذب بيها الفريسة، أو علي اقل تقدير، يعمل عليها طلعة استكشافية من خلالها. طبعاً مدي وعي الفريسة راجل او ست لهذه الخطوات هو كفيلة انه يدلق جردل مية ساقعة علي ام دماغ الصياد، ويخليه خالي الوفاض، او يديكي فرصة عزيزي او عزيزتي الضحية لادارة اللعبة من ناحيتك.

الشخص المبادر بالشقط هو غالباً حد بيحب يلعب سنجل مع بعض السيطرة، احنا هنا بنديكم خطوات افساد المخطط من حفلة صيد لدور شطرنج متكامل الاركان.

قوينا يا رب، نرش مية ونستفتح:

1.       مراقبة الفريسة من بعيد: من بعيد يعني من بعيد.

2.        التقل صنعة في اول محاولة، الاستمرار في المراقبة من بعيد لبعيد لحد ما تكمل بروفايل الشخص.

3.        يمكن طرح الاسئلة دائماً في اطار استكمال البروفايل، اسئلة زي : انت صحيح عيد ميلادك امتي، خريج دفعة كام، ساكن فين علشان اخدك في طريقي تصلح دائماً وتمنح الكثير من المعلومات.

4.        يلا نطلب اكل مع بعض/ نشرب مع بعض قهوة (تطفحوها بالسم يا بعدا).

5.       حسب المعلومات التي تم تجميعها في الخطوات السابقة، يمكنك معرفة المدخل بتاع الشخص: يعني ايه؟

يعني بتاع دين/ بتاع سياسة/ بتاع تهييس/ بتاع نسوان/ بتاع رجالة/ بتاع انابيب... الخ الخ

6.       ارمي للفريسة الاكستريم، وشوف هتروح لحد فين.

7.       المختلفون جذابون دائماً: وهنا بقي نقف شوية.

بعد مرحلة جمع المعلومات اللي فاتت، دلوقتي انت كونت فكرة عامة عن الشخص اللي عليه العين. احنا كبني ادمين عندنا ولع بالتصنيف، وبالتالي بتلاقي المعلومات الفاتت دي بتتستف مع بعضها وبتلاقي نفسك تلقائي سكنت الشخص ده او صنفته. الصايع بقي اللي ميقدرش يخليك تسكنه في تصنيف.

عارف انت اللي مبيتصنفش ده، ده بيبقي فريسة لذيذة فشخ، وممتعة جدا، وبيخلي المطارده اكثر اثارة.

8.       اللعب علي وتر اختلاف الفريسة مفيد دائماً، وبيجيب قوي يا معلم مع الحريم.

9.        الاصيع بقي مع الحريم: تلعب علي وتر: انتي اول حد الاقيه عقله مختلف كده، او: انا منبهر بعقلك

(عزيزتي الفتاة، انا راضية ذمتك يا شيخة: لو واحد انبهر بعقلك انتي، ايوة انتي، بذمتك مش ده كافي للتشكيك بعقله هو).

10.    التسبيل مهم يا جماعة، التسبيل: كل ما تعملي حاجه او تقولي حاجه، تلاقي الاخ رازعك نظرة تسبيل وهيام، ولسان حاله يقول: انتي بجد؟

             احا انتوا اصلا بجد!

ما علينا، اللي بعده.

11.    الكلام ال +18: انه الصياد يقول قدام الفريسة كلام من النوعية دي، او يهزر معاه/ معاها هزار فيه ايحائات جنسية ويشوف رد الفعل هيكون عامل ازاي، ده مهم لاستكشاف طبيعة وميول واهواء الفريسة.

12.    فيس بوكي: يلا نعمل لبعض اد عالفيس: وطبعاً دي اكتر خطوة في الدنيا بيبقي الصياد عايز يجمع بيها معلومات عن الفريسة، اديني بعرف عنك اكتر، واذا خطة الشقط فسلت اديني زودت الفريندز بتوعي نفر.

13.      انا زي اخوكي ستايل: النصيحة: لو الفريسة بيعمل/ بتعمل سلوك معتاد عندها، وانت مثلا مش عاجبك بغض النظر عن انه بيناسبها او هي متعودة عليه، جرب ناقشها فيه  واقنعها انه غلط، لو استجابت، يبقي اهلا وسهلا بيك: لقد وقعت الفريسة في الفخ.

14.    يلا نخرج مع بعض: تطفحوا اي حاجه يعني، المرة دي غدا او عشا.

15.     تكنيك الواتس اب في اوقات غير مناسبة من اليوم: ابعت قول لها او قوليله اي حاجه، اقتحمي مجاله بعد الساعات المعتادة اللي بتتقابلوا فيها، وشوفي استجابته ايه.

16.     لو بنت وبتوقع ولد: الولاد عامة بيحبوا اللي يعيشهم دور منقذين البشرية، فقطعاً الاعتماد عليه وطلب بعض الخدمات مع انك تحسسيه قديش انتي ممتنه ليه هيبقي حلو برضك

بس من غير استغلال، فاهمه!

17.    مدي سيطرة الصياد علي الفريسة في الاوقات اللي مش بيبقوا مع بعض فيها: وده مؤشر مهم لان الضحية وقعت في الفخ، وخطة الشقط بتكتمل بشكل ايجابي: يعني الكلام اللي بيقوله الصياد للفريسة بتاهد بيه ولا لأ، بتبعت تسأله في حاجات ولا لأ، بتحكيله عن النشاط اليومي ولا لأ، كدزة يعني.

18.    مش فاكرة  الصراحة.

19.     تكنينك عبد الحليم حافظ مع امال فريد: هذا التكنيك بالذات انا بحبه قوي، وبيستخدمه الصياد لما يلاقي الفريسة مفيش منها استجابه، الا وهو تكنينك: انا هضحي بسعادتي علشان انتي تعيشي، او انا بتألم وبتعذب ويروح قاطع الكلام علي كده. يهدف هذا التكنينك للفت انتباه الضحية مع توليد احساس بالذنب يدفع للتعلق، ده مع الضحية لما تكون عايشة في عالم الانسانيات او بنت ناس وحساسة.

20.    نظرة فلقاء، همسة فلمسة، وكلام في التليفونات  للساعة خمسة: الف مبروك عزيزي الضحية عزيزتي الضحية، انت اتشقطتت بنجاح.

اي خدمة يا جماعة، التحديثات والتعليقات والشتايم ستضاف لاحقاً

ترنيمة عيد الميلاد

النهارده 8 اغسطس، 
يعني عيد ميلاد ميت... 
ده عيد الميلاد رقم 28 لمحمد عادل، وعيد ميلادة التالت اللي بيقضيه في السجن. لو الدنيا مشيت كويس، هيبقي ده اخر عيد ميلاد في طره، انما لو ربنا له ترتيب تاني، هنشوف السنة الجاية هندون عن ايه. 
المفروض اني عامله دياكتيفيشن لفيس بوك من يوم تقريباً، لاني مش عايزة النهارده ييجي، واشوف في التذكير بتاع اعياد الميلاد ان عيد ميلاد محمد النهاردة.
مش عايزة اشوف حد منزل صورة محمد وكاتب جنبها (ربنا يفك سجنك يا صاحبي)، واللي هم اصلاً هيبقوا كام واحد يتعدوا عالصوابع. 
مش عايزة الاقي نفسي مضطرة اني اشوف صور محمد عالتايم لاين، واتعذب وانا بفكر في انه محبوس بقاله 3 سنين بسبب اللاشئ في قضية عبثية، وان محدش افتكره، عن قصد او عن تجاهل علشان مواقفه السياسية، او علي سبيل التوجيب ل 6 ابريل، أو علشان المظلومين كتير فاحنا هنفتكر مين ولا مين! 
مش عايزة الاقي نفسي ابقي مضطرة اكتب كلمتين الناس تقراهم وتنساهم، او يقروهم ويتودودوا زي ما بيعملوا دايماً، او يقروهم ويقولوا يا حرام، ودي اكتر حاجه انا بكرهها في حياتي اللي عمري ما كنت مستنية تعاطف من حد او بطلب من حد حاجه اساساً. 

فيه ناس مش قادرة تستوعب ان من يوم حبس محمد، وانا بحاول جدياً اني انسي مش انه بس محبوس، لأ انسي انه موجود، لأني لو افتكرت انه موجود، ومحبوس، ده معناه قدر بشع من الالم اللي انا مقدرتش استحمله قبل كده، ولسه مش قادرة استحمله.

فيه ناس مش قادرة تستوعب اني مريت بفترة من اسواً فترات حياتي، لو مكنتش الاسوأ علي الاطلاق من ديسمبر 2013، لحد قبل فترة بسيطة جداً لما بدأت اتعافي واشوف الدنيا حوليا بيحصل فيها ايه، بس "ملف محمد" لسه من ملفات " الالم الذي لا يطاق". 
في عالم المصريين اللي ربنا ابتلاني بيهم، وابتلاني بشوية قرروا انهم يشوفوا نفسهم (رواد تغيير) بس هم برضه رواد نميمة وسفالة ومكنش وراهم كلام في الفترة اللي فاتت غير الكلام عن " يعني انتي عملتيله ايه ومش يبتتكلمي عنه ليه"، بغض النظر علي انه تيت امهم جميعاً، الا إن الناس دي وغيرهم كتير قطعاً مكنوش معايا في رحلة التعافي اللي مدعمنيش فيها غير كام بني ادم وبني ادمة نضاف بجد (وهم من بره دايرة رواد تغيير الغبرة اشقاء النظام المصري كتف بكتف)، والكام بني ادم النضيف دول هم اللي كانوا عارفين المحنة اللي انا فيها، ده مع مأساويات تانيه فرعية. 
*******
بالعودة لعيد ميلاد التنين الاعظم،مدير مخابرات سوق التوفيقية، وقائد سلاح السوشيال ميديا والامن الصناعي في المخروبة 6 ابريل اعدائي الطبيعيين، أبو الفصاد صديقي الاثير، احب ادير معاه محاوره افتراضية من طرف واحد، وده مريح ليا طبعاً لان اي حوار مع محمد عادل هتبقي نتيجته اني هقوم اضربه برقبة ازازة: 
صديقي الاثير، ياتري نفسك في ايه في عيد ميلادك ال28؟ 
نفسك تاكل ايه؟ نجيبلك ايه هدية؟ تروح فين؟ تشتغل فين لما تطلع؟
نفسك يبقي ايه مشروع حياتك؟
ايه امنيتك اللي عايز تحققها (وياريت حاجه غير اللي انا عارفاها علشان منتخانقش بدري بدري)؟ 
ياتري لسه واخد موقف من اكل السلطة/ الدايت؟ (#هع #ساره_الشريرة_للغاية).
مش ناوي تعمل ليزك علشان تعرف تشوف طيب؟ 
ايه موقفك من صابون الغسيل المسمي بالغناء الملتزم؟ لسه بتسمع الحاجات المريبة دي ولا ربنا هداك؟ 

عامة، انا بعتذر لك اعتذار كبير يا محمد، ذكرياتك فشلت انها تحسسني باحساس غير الاسي او الحزن، مش قادرة امسك دموعي او اكتم المي كل ما افتكر عيد ميلادك، او أي عيد انت مش معانا فيه. بعترف اني بقيت اتكيف مع الالم، بس يمكن لاني والالم بقينا صحاب بعد فترة مرافقة طويلة! يمكن!!
انا عارفة يا محمد ان الكلام ده بقوله بس لانك محبوس، اكيد لو طلعت هنرجع نتخانق تاني، ونقاطع بعض، بس علي الاقل هبقي متطمنه ان صديقي الاثير معدش هيقعد في الضلمة لوحده، وانه علي الاقل هيكون حر مش محبوس بين اربع جدران صم. 
اتمني يا محمد من كل قلبي اني تبقي دي اخر مرة افتكر عيد ميلادك وازعل، شالله حتي يا سيدي اقرر في عيد ميلادك الجاي اني اعمل لك بلوك (زي ما عملتهالك قبل كده #هع). 

عزيزي محمد،
كل سنة وانت حر 

#ساره_الشريرة في ساعته وتاريخه (4 اغسطس 2016). 

تدوينة هايفة: محاولة لفهم السلوك الانساني المعقد

ده بمناسبة اني غالبا كنت في ال28 سنة اللي فاتو عايشة في الكهف مع افلاطون، بنتكلم عن الواقع الافتراضي والمدينة الفاضلة، اذ ان خير اللهم اجعله خير العلاج جاب نتيجة، وبدأت اسيب الكهف بتاع افلاطون واستكشف العالم الواقعي.

موضوع غريب شوية اني ارجع اتكلم فيه بعد سنة مبدونش فيها، وكمان كانت اخر تدوينة ليا عن الاختفاء القسري! اني يوم ما اقرر ارجع اتكلم، اتكلم عن العلاقات!

وانا بستكشف العالم الواقعي، كان فعلا واضح ان انا في الفترة اللي فاتت كنت غياب تماما...

انا طول عمري عايشة في اللالا لاند بتاعتي، مش بهتم بسلوكيات البشر اصلا ومش بتفرق معايا، حتي كنت بتعامل مع سلوكيات البني ادمين حوليا بنوع من الغرابة او عدم الاكتراث.

بس بما اني بدأت اكترث لاني بدأت اركز في اني عايشة وسط عالم وناس، فمن الحاجات اللي عملتلي صدمة حضارية، وفهمها بالنسبة لي معقد اكتر من فهم النظام السياسي العراقي هو العلاقات بين الذكور والاناث في ...العالم، بلاش في مصر.

تقريبا والله اعلم، ان العلاقة بين الذكور والاناث متختلفش كتير عن العلاقة بين قطيع الاسود وقطعان الجاموس البري، قامة علي المراقبة- تخير اللحظة المناسبة- ثم الاقتناص/الصيد. علي فكرة، مش لازم يبقي الذكر هو الاسد و الانثي هي الجاموس البري، مش حتمية ابداً، الموضوع ممكن يكون vice versa.

العلاقة بين الذكور والاناث قائمة علي الاقتناص أو الصيد، وفي احوال اخري يظهر اكشن غريب يسمي بالشقط، ولمن لا يعرف ما المقصود بالشقط، هو فعل قنص كائن حي من الجنس الاخر بغرض التعرف/ الصحوبية/ الرفقة.

حصل، ان بعض الاشخاص كانوا بيعاملوني بطريقة غريبة، وانا بتعامل عادي (اللي هو فورمة كهف افلاطون)، وانا لما جيت اسأل: خير هم بيعاملوني كده ليه، يقولولي: اصل فلان معجب بيكي!!! طيب هو لو حد معجب لازم يعمل كده، يلف ويدور ويراقب ويعمل اختبارات ثقة!!! اللي هو احا يعني!

هنا، يتم ملاحظة أن ذكر الانسان يبدأ في استعمال سلاح النظرات المتفحصة، ثم التعليقات المريبة، ثم التدخل في بعض التفاصيل زي انتي لون شعرك ممكن يبقي احسن، أو مقاسك كده ليه، ثم يبدأ في الحديث عن امور تخرج عن حيز علم النظم السياسية او التحليل الاقتصادي لانحفاض سعر الجنية، وبعدين يبتدي يسبل!

طب ما تجيب من الاخر يا برنس؟

هنا نلاحظ ان فعل الشقط في بنو الانسان يختلف عن فعل القنص في بنو الحيوان، انك ممكن تلاقي انسان من نفس فصيلتك بيساعد حد تاني انه يصادك علي سبيل السعي وراء النهايات – هاااااااااااح- السعيدة!

حقيقي سلوك فصيلة الانسان ده سلوك مريب!

الغريب اني لما بدأت اركز بدأت استوعب ان بين الرجالة والستات علي حد السواء، فيه تركيز في العلاقات واستكشاف الجنس الاخر، كل راجل شاغل باله يعلق مزز، وكل بنت شاغل بالها تعلق مزز برضه! (سياسة البلد تقريباً، قائمة علي التعليق).! لا تعليق!

نلاحظ في سلوك بنو الانسان شيئاً اخر، الا وهو، أن ارتباط احد الطرفين لا يمنع محاولته لشقط، او تعرضه لشقط طرف أخر! وده سلوك بيدل علي ان الانسان حيوان غير متحضر، لأ وطفس، وإن انثي النمر المتوحشة هي كائن ارقي واشرف من البني ادم بالنوعية دي.

طويب، ماذا اذا حاول أحد الطرفين رفض محاولة الشقط: الكائن الادمي كائن زنان، مش بييأس بسهولة، ثم ان اشتراكه مع الضواري في صفة حب الصيد او القنص، بتخليه يعيد تكرار المحاولة مراراً وتكراراً علشان (الحتة دي محدش هيجيبها غيري).

في مصر علي وجة الخصوص عادة لطيفة ترتبط بالشقط، الا وهي التحرش والخطف، ان اي مزة ماشية لوحدها في شارع او واقفة علي رصيف مستنية تاكسي او تعدي الشارع هي ممكن نحاول نشقطها بيس، ركبت العربية/ مصلحة، مركبتش، يلا اكيد هنعتر في واحده تركب.

الخطف وارد برضه!

السلوك الانساني سلوك مثير للاشمئزاز، مش بيحترم خصوصية البني ادم في انه عايز يبقي ذئب متوحد، او عايز يتوحد مع شخصيات الكوميكس اللي بيحبها، او يعلق صور مارجريت تاتشر أو جيرهارد شرويدر عنده في الاوضه! ما تسيبوا الناس في حالها يا جدعان.

في تدوينة لاحقة، هنتكلم عن بعض العوامل الشكلية والشخصية الل بتخلي الانسان هدف للشقط. انتظرونا في الجزء الاخر من التدوينة. 

 

انه العيد والميلاد: يوم صابنا الحزن ومقولناش ليه

تنويه هام: 
 التدوينة دي الافكار اللي فيها جاتلي بعد ما قريت الرسالة بتاعة اسراء الطويل من سجنها، الخطوط العريضة للتدوينة دي لحد قبل قراءة الرسالة كانت مختلفة. 
لسبب خاص جداً ميهمش حد غيري، انا عندي شوية سخط علي اسراء الطويل، بس ده لا يعني علي الاطلاق اني مش متعاطفة معاها حتي النخاع بالمناسبة ورسالتها اثرت فيا بشكل يخليني اعيد التفكير في تدوينة عيد ميلادي. 
**********************

اعزائي المشاهدين، 
زي ما عودتكم كل سنة، لازم اكتبلكم كلمتين مالهمش لازمة بمناسبة عيد ميلادي، وبما اني السنة دي قررت اشرككم في اختياراتي علي اساس انكم تختارو معايا حاجه جديدة وكدة يعني، وانتم اخترتم اني اكتب اللي انا متعودة اكتبه كل سنة اللي هو كشف حساب وطموحات وندب السنة اللي فاتت والندب المستقبلي وهكذا يعني، فده درس رائع جداً في إن فيه حاجات مينفعش فيها ترك الامور للديموقراطية، علشان الديكتاتورية كنز لا يفني #هع. 

طيب خلينا نبتدي بالسنة اللي فاتت، ايه اللي حصل فيها طيب؟ 
والله مش عارفة، السنة اللي فاتت كانت زي الزفت زي السنة اللي قبلها، اه بصراحة ومن الاخر كده يعني، لا صحابي طلعوا ولا صحاب الناس التانيه طلعوا، ناس اكتر اتحبست، ناس اتقتلت، وفيه تطورات دراماتيكية علي مستوي السواد اللي احنا عايشينه.
حققت انجازات؟ اكيد، بس بصراحة مش فاكراها.... هي مهمة جدا وعظيمة جداً بس لسبب ما انا مش فاكراها قوي. 
طيب ما تيجو نتكلم علي مستوي انجازات تطور الشخصية، وده اللي يهمني؟ 

كل سنة، براجع اللي بكتبه في السنة اللي قبلها، بحس ان اللي كتب الكلام ده شخص مختلف تماماً، اصلا انا ساعات بكتب الكلام وبعدين بدير وشي وارجع ابص عالكمبيوتر واقول مين كتب الكلام ده! اه والله انا هذا الشخص. 

بختلف كل سنة عن السنة اللي قبلها، بختلف كل شهر وكل يوم، مش مهم بختلف للاحسن او الاسوأ، بس المهم اني........ بختلف! طول ما انت بتتغير، فانت عايش.. طول ما انت مش بتتغير، اسأل نفسك: العزا طالع من عمر مكرم امتي؟ 
انا بكبر، بتفكيري، بعقلي، بسني، بشعري اللي بقي ابيض ، نظرتي للامور، مش مهم بقي بكبر بتهبل ولا بكبر بعقل، الاختيارات بتتحدد بالظروف والانسان للاسف محصلة الظروف اللي حواليه واستعداده للاستجابة. 

بقيت بتكلم مع الناس اقل، بقيت اهتم قوي ابص للناس في عينها، بقيت احاول افكر هم بيفكروا في ايه او ازاي ( حتي لو هشتمهم او اقول لهم رأيي فيهم بصراحة او هعمل لهم بلوك)، والاهم من كده، 
اني صحيت من حلم " كيف تغير الواقع" الجميل، وبقيت بفكر في اسطورة " كيف تحسن هذا الواقع الوسخ وتجعله قابل للحياة فيه". 
علي قد ما بقيت متسامحة، علي قد ما بقيت قاسية في عدائاتي وبمشي فيها لابعد حدود.. فيه حالة سلام سرمدي كده بكون فيها اغلب الاوقات، بس المشكلة لما بطلع منها ببقي عايزة اتخلص من الجرثومة سبب الخلل علشان استعيد رتابة الواقع بتاعي... 
(احيه ايه الهتي ده؟ !!).
هذا العالم ابن الوسخة لم يحبنا ولم يحاول حتي؟ طيب ايه الحل؟ مش لازم نحب العالم ده علي فكرة خالص يعني..
بس خليك صريح عالاقل في مشاعرك مع العالم، ولا ايه؟ 

*********************************
كترة الصدمات والاخفاقات اللي شهدتها وحصلتلي، خلتني اركز اكتر في مسألة " ماذا لو... وكيف كان يمكن تحسن الوضع" 
لعبة ماذا لو دي لعبة مدمرة، ومجرمة.. مش دايماً هتكون حلوة ابداً، 
وعلشان خاطر الناس الحلوة اللي صوتت للتدوينة عن " ماذا لو... ؟" تعالو نلعب شوية: 

ماذا لو: 
1- كانت ساره- انا – اتحجبت في اولي اعدادي وسمعت كلام صحابي؟  
2- كنت دخلت علمي علوم زي ما كل مدرسيني نصحوني؟ #هع 
3- كان ليا اصحاب في ثانوي اكتر؟ 

ممممممممممممممم، مستوي اخر!! 
4- ماذا لو مكنتش دخلت سياسة واقتصاد وكنت سمعت كلام ابويا ودخلت حقوق؟ 
5- لو مكنتش قابلت صحابي بتوع الكلية؟ 
6- لو مكنتش درست اجتماع سياسي وثقافة وسياسة واخترت في المناهج بتاعتي اختيارات الشعب؟ 
7- لو كنت جبت امتياز؟ والعياذ بالله؟  

عايزين اكتر: موجود: 
8- لو كنت كملت الماستر؟
9- لو مكنتش أجلت اخر مادة في امتحانات الماستر؟ 
10- لو في سنة الماستر النحس دي كنت خلصتها ونفضت لسفر صربيا في 2009؟ 
11- لو كنت نجحت في امتحانات الخارجية؟ ( يالهوي !!).
12- لو كنت اشتغلت في الحكومة من سنة 2009 زي ما كان نفسي؟ 
13- لو مكنتش فضلت بعاني من البطالة لمدة 3 سنين؟ 
14- لو كنت اتجوزت اول واحد اتقدملي؟ 
15- لو مكنتش سافرت تركيا في 2012؟ 

ومع المفاجأت الاكثر عنفاً: 
16- لو مكنتش قعدت في القاهرة يوم 27 يناير 2011، ومكنتش نزلت في 28 يناير؟ 
17- لو كنت وقفت في صف قدام علي كوبري قصر النيل؟ 
18- لو مكنتش نزلت يوم ماسبيرو 2011؟ 
19- لو مكنتش نزلت كل الاشتباكات والمظاهرات اللي نزلتها من 2011 لحد 2014؟ 
20- لو مكنتش مشيت في الشارع يوم 6 يونيو 2014؟ 
21- لو مكنتش روحت سجن طره ( الله يحرقه عاللي بنوه) اول مرة؟ 
22- لو كنت نزلت مع سلوي اخر مظاهرة نزلتها؟ 

لو مكنتش اخترت الاختيارات ال " مريبة" اللي عملتها طول حياتي دي؟ 
ما علينا!! 

سهل قوي تقعد تفكر في ايه اللي كان هيحصل لو مكنش حصل " كذا"، بس بعد ما هتفكر في ماذا لو، هتعمل ايه؟ 
عايز رأيي، كل الحاجات اللي محصلتش فوق دي وصلتني للمكان اللي انا قاعدة فيه دلوقتي ده، وبفكر في الافكار دي وبعمل اللي انا بعمله. 
يقيني الشخصي، ان مفيش حاجه بتحصل صدفة... 
حياتك كلها مترتبه علي مجموعة من الحاجات الغريبة اللي بتحصل في اوقات غريبة. اوعي تفكر ان فيه حاجه بتحصل صدفة، 
كل حاجه بتحصل لك في حياتك ليها هدف معين، بس ساعات في الزحمة انت بتنسي ايه الهدف ده... 
أو: اننا بننخرط في السرحان مع الجانب الغيبي، فبيضيع مننا الهدف الحقيقي اللي المفروض ندور عليه من " لماذا حدث ما حدث". 
انا بعترف اني كائن غيبي، ماشية ورا الحاجات الغريبة اللي بتحصل لي، اينعم كتير بلبس في الحيط، بس بحاول اني اقرأ الرسالة اللي في الازازة، مش اعمل زي كل الناس اللي بترمي الازازة تاني في البحر. 
ده صح ولا غلط؟ بأمانة مش عارفة، علي الاقل انا مقتنعة بدة دلوقتي وبعمله برضا. 
مش عارفه بكره هيجيب ايه، بس اكيد هيجيب حاجه مختلفة، وده في حد ذاته انجاز عظيم. 
يلا بقي، كل سنة وانا مختلفة، وكل سنة وانتم متجددين... 

" اللهم اعطني الشجاعة والقدرة علي تغيير الاشياء التي اقدر علي تغييرها، والقناعة والسكينة لتقبل الاشياء التي لا استطيع تغييرها، والحكمة لمعرفة الفرق بين الاثنين" 

كل سنة وانا طيبة.
28 :)