لأجلهم نحيا..... ولأجلهم ندون احياناً

24 يناير 2013:
مش دايماً لما بتخطط تكتب بتنجح، ومش دايماً لما بتخطط تحتفل، برضه الاحتفالية بتنجح..
التلقائيات افضل بكتير، حتي الثورات التلقائية ليها طعم مختلف.
تفتكر اول مرة، لبست يونيفورم المدرسة الابتدائي، ولا المدرسة الاعدادي (لو بنت طبعاً)... اول مرة!
اول مرة جربت اكلة جديدة وعجبتك، اول مرة شوفت فيلم وحبيته؟
اول مرة جربت تحب ؟ 
اول مرة نزلت عملت ثورة؟ 
ما علينا، مش هطول عليكم في الرومانسيات، علشان انا كمان مودي العالي ميلحقش ينزل.
النهارده في الذكري التانية لإحياء ثورة يناير... التي يقال لها مجيدة مع اني كنت فاكراها فريدة، وغيري بيحاول يسميها تفيده او فتحية.! في ذكري هذه الثورة اللي سميها زي ما تسميها، كل حاجه رجعت لنقطة الصفر!
مش عاجبك؟ طيب ومين قالك تعدي من جنب البومه؟ 
في مثل هذا اليوم من سنتين تقريباً، كنا عايشين في نفس الظروف، بس مكنش وقع مننا فوق الالف وردة...شباب زي الورد، لما تشوف صورهم تسأل نفسك، ليه هم ماتوا وانا فضلت عايش؟ 
علشان اشوف صوركم واتعذب بيها؟
شهدا الثورة هم الحاجه الوحيدة اللي مخليانا نكمل الثورة، لا مصر البهية ولا مصر القوية حتي، مشيوا جنبك صف بصف، انقذوك مرة، او ملحقتش انت تنقذهم مرة... بس انت عايز تاخد حقهم، حق الجندي اللي قاتل جنبك في المعركة، هو استشهد وانت اتكتب عليك تدخل معركة تانيه.
اللي بيقاتلوا في الحروب عارفين معني شرف السلاح والدفعة والحاجات دي، مش دايماً علي فكرة بيكون الوطن هو الغاية، احياناً بتكون فيه غايات اسمي.
طيب:
حق الشهداء ليس قميص عثمان كلمة حق يراد بها باطل، حق الشهداء هو الدافع الوحيد وراء استمرار سياسة ضرب الرأس بالجدار، ومصارعة الشلالات التي يقوم الثوار بها في كل ما يخوضونه من معارك.

هنكمل ثورة، لحد ما نجيب حقهم،
وهنفضل نكتب لحد ما نجيب حقهم...
اقول لكم اعتراف؟ انا كل ما بشوف صور حد من شهدا 25 تحديداً، بحس بذنب فظيع!! خصوصاً احمد بسيوني، وزياد بكير!

الاتنين كانوا فنانين، واحد مصور والتاني فنان جرافيك في الاوبرا، انا بحب الفن، وجربته شوية، وعارفه كويس احساس الفنان لما يعمل ثورة.
الاول داست عليه مدرعة بعد ما اتقنص من قناص وسخ،
والتاني فضل في المشرحة واتعرفوا علي جثته بعد ما الثورة خلصت..
وانا وغيري لسه عايشين بالذنب!!
مش بسيوني وزياد لوحدهم، غيرهم يا سيدي متعدش من ماسبيرو لمحمد محمود لبورسعيد، للعباسية، للإتحادية.... كتير.
حق الشهدا... وبس،
حقهم، نقطة ومن اول السطر!
تقول بقي ذنب، تقول قسم سلاح، قول اللي انت عايزه،
بس الحقيقة الوحيده الاكيدة في 25 يناير 2013، ان فيه واحد مات وحقه لسه ماجاش،
حقه كان حلم، والحلم ده لازم يتحقق، بغض النظر انا مؤمن بالحلم ده ولا لأ، او لسه مؤمن بيه ولا لأ، لانه كان حلمي انا كمان، ولا نسيتوا؟
انت حلمي يا شهيد، انت الحاجه الوحيدة اللي مخلياني مكمل...
صور بسيوني وكريم بنونه، واسلام، وزياد وسالي،
صور كريم خزام وهيكتور وحونيور، وجيكا وحسيني،
صورة الشهيد المجهول!!
يناير 2013: اهداء للشهداء، يا من لأجلهم نحيا،
ولمن لأجلهم مازلنا نحلم،
ولأجلهم، نمسك الاقلام لنكتب...
طوبي لكم 

ثورة الفياجرا

قبل أن تقراً: هذه التدوينة قليلة الادب وممكن تخدش حيائك لو حيائك يعني ناقح عليك،
فلو قريتها ورجعت تقول لي : ايه الكلام ده، او عيب، يبقي ذنبك علي جنبك، 
واديني حذرت......

ممنوع القراءة للناس اللي عامله نفسها مؤدبة..


بقالي فترة بتفرج علي اعلانات منشطات جنسية!! هار اسود، دي بقي بيتعمل لها اعلانات، وكتيييييييييييير، يا عم ولا اعلانات الرابسو والصابون!
بدأت هوجة الاعلانات بتاعة المنشطات من وقت قامت شركة فايزر بتحديد سعر قرص فياجرا الاصلي بعشرة جنيهات فقط! بدل ما كان تقريباً ب25 حاجه زي كده يعني، 10 جنيه بس علشان مفيش راجل يمشي فيكي يا بلد راسه محنيه ولا حاسس انه ولامؤاخذة خروف- طبعاً البلد فيها خرفان كتير شايلين سلاح وبيعملوا عروض عسكرية وبيضربوا الستات، ما علينا.
قرص فياجرا الاصلي بقي بعشرة جنيه بس، وحقن بيكربونات الصوديوم ناقسة في كل مستشفيات مصر بقالها كذا شهر، بيكربونات الصوديوم علي فكره الحقنة باتنين جنيه ونص,,,,,,,

عامة اعلانات المنشطات في مصر عندي معاها مشكلة نفسية انها شديدة الفجاجة، واللي مش عاجبه كلامي يبقي يتفرج علي الاعلانات بتاعتها، شئ قمة الفجاجة وانتهاك ادمية الانسان! حقيقي مجتمع شايف الرجولة القدرة علي اداء الديفوار الزوجي، اهم حاجه النص ساعة بتاعة يوم الخميس بالليل، والراجل يتأكد انه بيعرف!
سؤال خبيث، هي اشمعني دي الحاجه الوحيدة اللي الراجل بيبقي علي طول عايز يتأكد انه بيعرف يعملها؟ 

برضه ما علينا، تقريباً انا رصدت 3 انواع منشطات جنسية بتتباع في الصيدليات واعلانتهم مغرقة التلفزيون والراديو والشارع، وباسعار نسبيا في متناول يد ال....ولامؤاخذة الراجل !

طيب اللي مجنن اهلي بقي
، منين الفياجرا ترخص، والبيبسي سعره يعلي، يا كفره؟
البيبسي ليه ؟
علي فكرة، اسعار البيرة والسجاير كمان ارتفعت، وانا رغم اني لا بشرب بيرة ولا سجاير، الا اني مستغربة ومعترضه علي رفع اسعارهم! طبعاً، انا البيبسي ده مزاجي، اجي اطلب اعدل دماغي واسيب دماغ باقي الناس تخرب ؟ (ابتسامة شريرة خبيثة).!
طيب تعالوا نفكر بمنطق تاني، ان النخبة الجديدة، اللي عاملة نفسها اسلامية وحط تحت الكلمة دي ميت خط،  اكيد، اللي مش بتهتم غير بالحريم لبسوا ايه قلعوا ايه هببوا ايه، وعايزين يجوزوا البنت وهي عندها 9 سنين ومش عاجبهم قانون التحرش، وشايفين السافرات كفرة وكدزة يعني، طبيعي يهتموا يخلوا الفياجرا في متناول يد الجميع، علشان يطفوا رغابتهم اللي مبتهداش،
وطبيعي ان النخبة الجديدة العاشقة للجنس والساعية وراء المنشطات، هي نخبة متدينة تفضل البحث عن اطار شرعي لتفريغ الرغبة، حتي لو هيناموا مع بنات عندهم 9 سنين، بما لا خالف شرع الله، النخبة دي لا بتدخن ولا بتشرب خمور، وبتقاطع البيبسي لانه طبعاً منتج اسرائيلي، وبالنسبه لهم البيرة والسجاير دي بتاعة العيال الكفرة ولاد الوسخة اليساريين والليبراليين العلمانيين الفكرة!
يبقي انتم معترضين علي رفع سعر البيرة والبيبسي والسجاير ليه؟
سعر السجاير ارتفع بنسبة 150%، وتلات تربع الشعب بيدخن، لو سمحت متبقاش فج في تأييدك للقرارات لدرجة انك تقول ان دي وسيلة نافعة لاقناع الشعب ان التدخين مضر جداً بالصحة والجيب، البيرة الصراحة ماليش فيها، بس يعني جت علي دي، فيه ناس بتشرب، بس متهيألي اللي بيضربوا سجاير اكتر، ولا ايه؟
ما علينا برضه، 
طيب مش السجاير والبيبسي والبيرة بس اللي ولعت، شوف ايه ارتفع سعره تاني: 

قائة باسعار السلع والخدمات التي خضعت للزيادة


السؤال بقي اللي انت ممكن تسألة لما تشوف الضرايب الغريبة والارتفاعات الغريبة دي، هو: هو نزل الزيادات دي ليه؟ 
بتفكرني بالضرايب الغريبة اللي كان بيفرضها الحكام الاجانب علي مصر علشان يلموا بيها فلوس (ابتسامة شريرة خبيثة تانيه)، يعني هو اخضع كل حاجه في حياتك لزيادة ليس ليها اي مبرر او ليها مبرر هو بس اللي عارفه.
الفكرة ان الكهربا كمان زادت، والدعم بدأ يترفع عن البنزين، يعني هو عمال يزنق فيك يزنق فيك يزنق فيك، وبعدين يستغرب لما انت تنزل تعترض! طيب حاسب علي محسوسات الشعب يا اخي في الزروف الاقتصادية المنيلة بستين نيلة دي، دي اليونان ولعت بسبب سياسات التقشف، تقوم انت تقشفها علي شعبك اللي عايش في تقشف اساساً!! 
طيب ما تقشفها علي جماعتك يا ريس، ولا هم جماعة الامر بالمعروف واحنا جماعة الامر بالمنكر؟
طيب انا ايه اللي مضايقني في رفع سعر الكهربا ولا الانبابيب ولا اي حاجه، هي مش الفياجرا رخصت؟ والعلبة الذهبية في متناول يد المواطن؟
بلاها الكهربا، والبوتاجاز، والتعليم، وخلينا نظيط ونقضيها عط ، وطله بما لا يخالف شرع الله.
بس والنبي ابقوا قولولنا المخدرات هتغلي امتي.
اصلاً احنا عملنا ثورة علشان الفياجرا ترخص،
وبيكاربونات الصوديوم تختفي من المستشفيات.
يلا مش مهم، بس والنبي في الثورة الجايه اوعي حد ييجي جنب شيكولاته جالاكسي ولا كيت كات.

هل أتاكم حديث الشهداء ؟

الثلاثاء، 9 أكتوبر 2012:
عام بالتمام والكمال عدي علي مذبحة ماسبيرو ، مش ناوية اكتب عن ذكرياتي مع اليوم، مش ناوية أكتب تأملات شخصية، بس ناوية افتح كشف الحساب، لأن أكتر من كده هو رثائيات شخصية ما تهمش حد غيري، بس في البداية هحيلكم لكام حاجه ممكن تفكركم باليوم:
شهادات ماسبيرو
وهي مجموعة شهادات لأفراد تواجدوا في محيط منطقة ماسبيرو- التحرير- رمسيس في نفس توقيت المذبحة التي بدأت مع المسيرة السلمية للأٌباط من دوران شبرا، ولم تنتهي عند مستشفي القبطي في رمسيس.
شهادتي مسجلة بإسم: شهادة ساره أحمد فؤاد، مش هتلاقوها انجاز كبير وسط الشهادات المتينة المذكورة، بس ممكن تاخدوا جولة سريعة علشان تفتكروا المذبحة بالضبط حصلت إزاي...
شهادة ساره احمد فؤاد

سيبكم بقي من طوفان الذكريات، وخلينا نبتدي كشف الحساب: 

1- ألام المسيحيين في مصر:
بعد عام من مذبحة ماسبيرو، هل تغير الوضع كثيراً بالنسبة للمسيحيين: طبعاً لأ، الوضع بقي أسوأ، كل مدي الوضع بيسوء زيادة، كل ما تحصل مشكلة يقوللك هجر المسيحيين واخلص منهم، كل ما تحصل حكاية يقول لك لازم المسيحيين يطلعوا يعتذروا، وحوار الاساءة للرسول مكنش خافي علي حد......
بعد سنة من مذبحة ماسبيرو، لسه المسيحيين المصريين هم اول ناس بنضحي بيهم في اللعبة، وشباب المسيحيين يا عيني حيران بين جيل الاباء المحافظ لدرجة الاستكانة، وجيل الشباب المتمرد لدرجة الثورة، بس هتروح فين ولا فين يا حبيبي، انت في الاخر مالكش دية، هتندهس تحت الدبابة وهيقولوا عليم نزلت تضرب الجيش،وده ينقلنا للنقطة التالية....

2- ماسبيرو: آله الكذب عند المصريين المحدثين:
اتذكر يوم أحداث ماسبيرو ما بثته القناة الأولي من التلفزيون المصري عن المسيحيين اللي نزلوا يضربوا الجيش .....فاصل من العبثية الغير تقليدية والتي اعتاد التلفزيون المصري علي اتحافنا بها، بس الكوميدي بقي مش العبثي، إن الموضوع عدي ودي !!!
يعني المذيعة كانت متوترة، والاعصاب كانت مشدودة، ونسي الجميع، أو تناسوا، إن المذيعة بنت ال................نظام اعلنت ان المسيحيين نزلوا يضربوا الجيش قبل ما يحصل اشتباكات أصلاً،
يا عم ده حتي الناس اللي نزلت علشان تحمي الجيش اكتشفت ان الجيش بدأ يضرب في المتظاهرين، فشوية منهم راحوا يدافعوا عن المتظاهرين!!! طيب هل الست رشا مجدي اتحاسبت ؟ حد سأل مسئولين ماسبيرو عن الكلام اللي اتقال واتذاع وسمعه 80 مليون مواطن؟ طيب لو حصلت بعد كده حوادث طائفية ضد المسيحيين بحجة أنهم بيقتلوا الجيش، هيبقي دمهم في رقبة مين ؟
بلا نيلة، كان حد حل مشكلة "الخلية الصربية" اياها.!!!!

3- كيف مات من مات، جيش يفقد اعصابه، وقناصة، وأشياء أخري:
طيب احنا مش هنفتح قصة "فين الدبابة، ومين اللي سرقها، وإيه العبارة".... الدبابة كان بيسوقها عسكري، عسكري فقد اعصابه في ظل ظروف اشتباكات مدنية مدنية بحته... طيب مش هتفلسف وهتكلم عن تدريبات ضبط النفس اللي بتتعمل المفروض لشكل دوري للعسكرين في إطار تحسين أداء الجيوش لو حصلت حروب ...مش هتفلسف في النقطة دي، ومش هتكلم في إن دي جريمة اتعملت ومحدش اتحاسب عليها، بس كالمعتاد هاصطاد في المية العكره،
محدش خد باله إن مينا دانيال اتقتل برصاص قناصة؟ الرصاصة اللي دخلت وطلعت من جثمان الشهيد، مضروبة من مسافة بعيدة والدليل علي كده انها ماستقرتش!!!
محدش يسألني تاني فين الدبابة، انا عايزة اعرف فين القناصة ؟ مين اللي قنصنا، مين اللي قتلنا، وإيه العبارة؟

4- شارع رمسيس- مستشفي القبطي: العبثية مستمرة:
المسألة لم تتوقف عند حدود: الحق ياض المسيحيين الكفره بيضربوا الجيش، لاااااااااااا، دي جحافل الدفاع عن الاسلام العظيمة احتلت شوارع وسط البلد ومتعرفش دول محطوطين في الدرج مثلاً بيطلعوا بالتليفون! ما علينا ،
بعد ما الاقباط المجرمين الكفره قتلوا الجيش وبعد ما علاء عبد الفتاح سرق المدرعة، وبعد ما طلعنا نجري من التحرير والجيش بيضرب علينا نار ، وطلع المصابين والشهداء علي مستشفي القبطي اللي مكانش فيها لا مشرحة ولا دكاتره ولا اسعافات كافية، اكتمل المشهد ا أكتوبر لعبثي بجحافل المتدينين تمزق الانجيل وتهتف: النصاري فين الاسلام اهو، ومولتوف ينضرب علي مستشفي القبطي وحجاره وتمشي في الشارع تتسأل انت مسلم ولا مسيحي ؟ طيب لو حظك العاثر خلاك تقول انت مسيحي، كنت هتصلب مثلاً ولا تتعلق علي عمود نور في وسط البلد؟ 
في عز المسخرة بنتجاهل ان يوم أحداث ماسبيرو حدث تحريض طائفي عنيف وممنهج ضد المسيحيين، في إطار استكمال سيناريو المسيحيين اللي ضربوا الجيش، وإن التحريض الطائفي ده خرج من الدرج علي إيد ناس النظام اللي لسه مسقطش كل ما بيتزنق بيطلعهم، سواء سلفيين جهاديين مخبرين لابسين عمم وبدقون، ما تفرقش، بس اللي يفرق اللي حصل في الشارع.
بس ايه الهبل اللي انا بحكيه ده، اذا كان التحقيق ما اتفتحش في اللي مات ولا في الدبابة اللي دهست، ولا القناصة، هيفتحوا تحقيق في مظاهرات خرجت تهتف ضد المسيحيين اللي ضربوا الجيش ؟
انا كدابة !!! طبعا، حتي راجعوا شهادة حسام بهجت شخصية من أكثر الشخصيات احتراماً وحيادية وحكت الكلام ده بالتفصيل.

5- الحقيقة المرة: هل يعيد التدوين ما اضاعه الرصاص:
بنكتب، ونفتكر، ونعذب نفسنا، وننزل الشارع، ونعمل فعاليات، رغم أن ما اُخذ بالمدرعة لا يعود إلا بالقصاص، لكن الامل في العدالة والقصاص حلم، كل مرة بننزل نمجد في أسماء الشهدا كأننا بنعتذر عن اننا سيبناهم يموتوا، كأننا بنقول، احنا اسفين يا شهيد، ومش ناسيين حقك، بس يا تري هل فعلاً احنا مقتنعين بالكلام ده، ولا بنتخيل اننا بنعمل اللي علينا،
طيب ايه اكتر من كده ممكن نعمله ؟ الاصرار- الاستمرار في المطالبة بالحق..
طول ما انت فاكر، مفيش حاجه هتضيع، اقل واجب الاجيال القادمة علشان يعرفوا مين كان بيدور علي حقه، ومين غطس في الدم وشرب منه وقال هل من مزيد...
لو اضعف الايمان بس اننا نقتكر، ما ننساش، نفضل نبص في عين القاتل ونقول له ايوه انت قتلتني وانا مش ناسي، نفضل نفكره بالجريمة، بس خليك شوكه في زوره، يمكن يتخنق بالشوكة دي.
انا عندي أمل، للأسف لسه عندي امل، بضحك علي نفسي وبقول بكره نجيب حقهم، يمكن....
يمكن!!!

الثلاثاء 9 أكتوبر 2012، يوم التدوين في ذكري أحداث ماسبيرو...

اسيبكم مع شوية فيديوهات ممتعة من واقع أحداث ماسبيرو.....

1- التلفزيون المصري يحرض علي أالاقباط: الحقوا الاقباط بيضربوا الجيش ....

 2- حسام بهجت مع يسري فودة عن أحداث ماسبيرو:

3- فيديوهات كتير لمشاهد الدهس قررت اني مش هنزل منهم ولا فيديو، اليوتيوب مليان........ بس انا مش هقدر اشوف، اسفة!!



4- وأخر فيديو: ليه الثورة جميلة وحلوة وانت معايا : 

5-الدولة تحرض علي العنف الطائفي: تقرير المبادرة المصرية

اغتصبني ...............شكراً

الكلام عن التحرش بقي عامل زي الطبخة البايته، يوم ورا يوم مالهاش طعم، بل وبقت حمضانه من كتر الكلام عنها ، وفقدت معناها ، الكلام عن التحرش في شوارع القاهرة بقي عامل زي مطالب الثورة العياذ بالله، بدأت كبيييييييييييرة وانتهت علي مفيش، وبقي الكلام عنها مسلي زي حكايات قبل النوم كده .
كلام ساره مش هيقدم ولا هيأخر، فيه كتير قبلي اتكلموا وكان صوتهم اعلي بكتير، سواء شيرين ثابت او ايزيس خليل ، وغيرهم وغيرهم ولاد وبنات اطلقوا صرخات اعلي بكتير عن التحرش ، وبرضه مفيش حاجه بتتغير غير ان المتحرشين اخدوا بالهم اكتر وبقي عندهم اصرار اكبر واكبر علي التحرش.
طيب خليني احكيلكم واقعة لطيفة ،
الاسبوع اللي فات وانا راجعه من الشغل الساعة 8 تقريباً، ماشية في شارع شاهين في العجوزة، شارع متوسط وكويس مش منطقة بيئة ولا حاجه، ماشية وسط اطفال صغيرين بيلعبوا، ا1 فجأة لقيت حد ضربني من ورا، ابص ورايا الاقي عيل صغير عنده بالضبط اقل من سبع سنين واقصر من ركبتي....
طبعاً الصدمة خلتني اطلع اجري وراه، والكوميدي اني لما طعت اجري وراه قعد يعيط، وراح يستخبي ورا راجل كبير ، المهم اني بكل قوتي وقرفي ضربت الولد علي دماغه بالبوكس، وقلتله، انت اتجننت في عقلك يا كل يا اين الكلب,,,,وشوية شتيمة وصريخ وفرجت عليا الشارع بالمعني الحرفي للكلمة، وانا بصرخ بأعلي صوتي زي المجنونة ، والولد بيعيط، 
وفي ختام هذه المسرحية صرخت في الولد وقولتله، وحياة امك لو عملت كده تاني هكسر رقبتك...
طبعاً الواقعة كوميدية لأقصي درجة، وانا بطلع كل قرفي وغلي في عيل صغير طول ركبتي ،
ولما روحت البيت، قاعده بسترجع شريط القرف والمهانة، وبفكر: عيل صغير مش فاهم اي حاجه في الدنيا بيتحرش بيا!!!! ازاي ؟
جابها منين ؟
ايه اللي خلاه يعمل كده ؟
ثم الفكرة الاحلي: انا كان حظي مع عيل صغير القلم اللي اديتهوله هيخليه يفكر الف مره قبل ما يعدي جنب بنت ، مش يلمسها ،
طيب لو نفس الواقعه حصلت مع شحط بالغ ، كان ايه هتبقي النتيجة ؟
اكيد النتيجة هتبقي زي كده  

تحرش جنسي يؤدي الي القتل


اخر واقعة تحرش جنسي في اسيوط ادت لمقتل المجني عليها، لانها لما بصقت في وش المتحرش قام ضربها بالقلم، فلما وقعت علي الارض وقبل ما تقوم طلع بندقية ألي وضربها بالرصاص ،
وماتت ايمان !!!!

غلطانة ايمان، اعترضت عليه لما حاول يهتك عرضها، ليه بس يا ايمي عملتي كده، ما تسيبيه يا ماما، مش كان زمانك عايشة !!
*******************************************************************************************
في مثل هذه الايام الصعبة والظروف اللذيذة من تاريخ الوطن، تحول الدفاع عن الحق في سلامة الجسد ....حفاظ الانسان علي جسمه، الحاجه الوحيدة اللي هو بيمتلكها دون نزاع، تحول لفعل انتحاري ، قد يؤدي للموت ببندقية إلي ...او ان حد يلطشك بمطواه في وشك، او ان حد يضربك في المترو أو أو أو ....
كل مرة بركب اتوبيس او بمشي في الشارع، بقول يا رب سلم، مش عايزة حد يلمسني ، لان الظروف اثبتت ان عندي درجة غير طبيعية من الشحن ومش لوحدي ، كل بنات الجيل اللي شاف فيلم 789 تحرش .
كونك بنت او انثي اصبح مبرر قوي وقاطع عند يا دكر انه يقفش الحتة الي عاجباه في جسم سيادتك، ولو اعترضتي ، تبقي بنت كلب تستاهلي الرشاش ولا الالي .
طيب احنا ليه معترضين يا جماعة علي التحرش، طيب ماهو لو حق مكتسب يبقي احنا المفروض نقدم اجسامنا بكل سرور الي السيد الذكر، يقفش فيها الحتة اللي علي مزاجه، في الحته اللي عاجباه، وفي الوقت اللي هو عايزه،
ولو عايز اكتر مفيش مشكلة......
 مازلت أؤكد علي ان التحرش هو اغتصاب لجز من جسم البنت، فعل لا يقل عن الاغتصاب الكامل، 
لو ولد جرب التحرش، هيفهم كويس احنا اللبنات قصدنا ايه.
افتكر في مرة اتعرضت فيها للتحرش، فضلت يوم كامل حاسه ان جزء من جسمي اتاخد مني، حاسه انه مش موجود، وفشلت لمدة اسبوع استحمي لمدة ساعة تقريباً بحاول اني اغسل جسمي من اثار الايد القذرة،
عايزة امسحها من جسمي،
عايزة امسحها من ذاكرتي................
لو حضرتك جسمي عاجبك، ما تاخده كله وخلاص ؟
عزيزي المتحرش، انا عايزة ارضيك.
عزيزي المتحرش، اهم حاجه تبقي انت مبسوط،
عزيزي المتحرش، بدل ما تلمسني وتجري، ما تكمل عليا وخلاص، 
اوعي تفتكر اني هبقي متضايقة، ابسلوتلي، انا اللي هيضايقني اكتر انك متستمتعش بفعلتك الوسخة، وانك ماتاخدش مزاجك مني كامل.
 لو اغتصابك ليا هيرضيك،
ويرضي المجتمع اللي كل مرة بيجيب الذنب عالبنت، مرة بلبسها ومرة بصوتها ومرة تالته باللي بيمشيها في الشارع ده ،
فهيا بنا يا سيداتي نعمل اكبر حملة في تاريخ التواصل الاجتماعي، هتبقي حمله هايلة وهتكسر الدنيا، 
معاً من اجل اغتصاب أمن للفتيات....
ولا البوليس هيتضايق بالبنات العاهرات اللي مش عارف يحميهم ولا يحقق الامن،
ولا الرجالة هتتضايق من البنات اللي بتصوت وبتكتب وبتعمل وقفات،
وسيعم السلام المجتمع، وتبقي هي دي نهاية التحرش ، لما يتحول من فعل مجرم لفعل محلل وشرعي ومقبول اجتماعياً.
وفي نهاية المسرحية السخيفة، 
صرخت الفتاة، فضربها المتحرش بالرصاص،
 فماتت الفتاة،
وضحك المتحرش،
وشعر المجتمع بالرضا،
وقال الرجال والنساء ايضاً: هم اللي يستاهلوا،
وقال القضاء: ماليش دعوة،
وقال البوليس ايه اللي وداهم هناك،
وانتهت المسرحية الهزلية.....

عزيزي المجتمع،
اتفووووووووووووووووووووووووووووووووووووووووووو عليك 


وبرضه محدش قال دم ايمان في رقبة مين ؟

حلاوة روح...

النهارده 9 سبتمبر ...
الدنيا ضلمة قوي، كل حاجه عندي بايظة...
حياتي كلها دخلت الانعاش بالمعني الحرفي للكلمة، الماجستير، الشغل، حياتي الشخصية..
ده أسوأ يوم عدي عليا من بعد اعلان نتيجة انتخابات الاعادة، بصراحة.
مش مهم، كل المحن دي هتعدي، بس المشكلة الوحيدة في المحن، انها لما بتعدي، بخلق عندنا اجسام مضادة منها.
كل محنة عدت عليك سابت فيك حاجه تخليك اقوي عند المحنة الجاية، وهي دي بقي المشكلة...
بعد ما محن حياتك بتخلص، بتبقي انت شخص غير قابل للهزيمة.... مفيش حاجه بتقف قدامك، بتحس بالقوة المطلقة،
بتحس ان مفيش حاجه تقف قدامك ، وانك تقدر تدوس علي اي حد.
نظرية "النصال التي تتكسر علي النصال"، نظرية صحيحة تماماً للأسف.
حاليًا انا مش مبسوطة، لاني بالطريقة دي ممكن ادوس علي حاجات كتير وانا مش واخده بالي.
مستوعبة المشكلة بس مش قادرة احلها، ماشية في الطريق المرسوم.
احساس انك بتحارب من غير ما يبقي عندك حاجة تخسرها، احساس بغيض...انك لا تبقي باقي لا علي حد ولا علي حاجه....
بالضبط عايشة احساس الفرخة المدبوحة، عمالة اتنفض وانا بطلع في الروح، والمصيبة اني عارفة اني مش هموت ..
اني هرجع اعيش تاني، بس حياة من غير حياة.
يا رب احميني من الحياة زي الاموات،
واحفظني من القسوة.