خلف خطوط العدو

بمناسبة الذكري السنوية لأحداث محمد محمود، بفكر المرة دي اقف في صف الطرف "الاخر..!!!".
طول عمري بقف في ناحية اللي بينضرب، بعيش احسيسهم، مخاوفهم، مشاعرهم،
مرة نفسي اقف في صف اللي بيضرب، اعرف شعوره..
انا ببقي خايفة، فياتري هو بيبقي خايف؟
انا ببقي مترقبة، فياتري هو كمان بيكون مترقب...
انا بزعل لما حد من صفي بيتصاب، وبصرخ وبعيط، فياتري عدوي بيحس بنفس الاحاسيس؟
هو احنا ليه مبنتعاطفش مع اعدائنا ؟ 
ماهم كمان عندهم مبررات تخليهم يكرهونا؟ 
***************************************************************
بفكر كتير في اني فعلاً بكره اعدائي، بس عمري ما احتقرتهم، وطول عمري بحترمهم، اه والله، وبتضايق قوي لما حد يسفه من اعدائي، اصل عدوي لو تافه يبقي انا اتفه منه لاني بفكر في حربه، قوتك وقوة قضيتك نابع جزء منها من قوة عدوك، فبتحقر منه ليه؟
وكما قال راسبوتين، قوة المرء تقاس بعدد اعدائه، وخليني انا ازود عليه، بقوة اعدائه.....
احياناً ............................
هو انت جربت مرة تبص في عين عدوك، وهو بيحاول يخلص عليك؟
*************************************************************
لما كنت صغيرة- انا اصلاً لسه صغيرة- كان عندي مشكلة فظيعة اني بتكسف قوي اكلم الناس وانا ببص في عينيهم، كان عندي خجل مرضي وعقد نفسية وكدهوة يعني، لما كبرت شوية واخدت تلتميت كورس اتش ار وحاجات من كده، اتعودت لما اكلم حد ابص في عينيه، النظر في العينين من اشارات التواصل القوية،
بس بمرور الوقت، اكتشفت ان العيون بتفضح وبتكشف، وكل اللي بيحاول اي حد يخبيه، بيتكشف من لغة العيون،
ومن ساعتها، وانا بقي عندي هوس اقرأ عيون الناس، علشان اعرف بيخبوا ايه وبيكدبوا في ايه.
محدش يعرف ان ليا اعداء.... بس الاكيد ان محدش كتير يعرف اني كنت ببقي حريصة قوي اني اشوف اعدائي مرأي العين، مش كده وبس، لا ابص في عيونهم كمان، اشوف فيها ايه.
سيبك من كنت بشوف فيها ايه، بس بقيت احب ابص في وشوش وعيون اعدائي.....
يمكن افتكرها وقت المعركة، واعرف انهم برضه بيكرهوني قد ما بكرههم واكتر،
وخايفين مني اضعاف ما بخاف منهم.....
عدوك اللي يخاف منك يبقي خسيس، وغدار وندل، وممكن يضربك في ضهرك،
لكن عدوك اللي مش بيخاف منك، ده اللي ممك تاخد منه معركة -شبه شريفة بتحفظات- وده اللي اقدر اقول لك بكل ثقة، لو قتلته، ابقي اديلة التحية العسكرية وازعل عليه.
********************************************************
لو بصيت في عيون عدوك؟ مش هتقتله؟
هتعرف ان عنده اسبابه اللي تخليه يكرهك؟
هتعرف ان زيه زيك، عنده احلام وطموح ومخاوف؟
لو بصيت في عين عدوك، يا تري هتلاقيه باصص في عينك؟
انا بقول لك، مستحيل، لانه لو بص في عينك مش هيقتلك،
علشان كده انت مش بتبص في عينه، علشان لو بصيت في عينه، مش هتقتله؟
يا تري لو بصيتوا في عينين بعض؟ هتفهموا انكم الاتنين ضحايا؟
مفيش اتنين بيتحاربوا بيبصوا في عينين بعض.
********************************************************
لما تيجي تحارب عدوك، متع نفسك وانت بتشوف الخوف في عينه، 
لانك لو بصيت في عينيه هتلاقيه خايف، 
فلو خلص عدوك عليك، يبقي كفاية عليك انك تعرف انه حتي وهو بيموتك،
كان خايف منك......
*******************************************************
الشئ المؤكد، ان محدش بيبص في عيون الجثث،
طيب ليه؟
خايف تشوف اخر نظرة بأخر فكرة جت في دماغه وهو هيموت،
ومش عايز تفكر في اخر فكرة هتفكر فيها وانت برضه بتموت؟
جرب تبص في عينين الميت،
يمكن عايز يقول لك حاجه.... او حتي عنده امنية اخيرة كان نفسه تحققهاله.
عايز رأيي الشخصي، كل الجثث شكل بعضها، بغض النظر عن القاتل،
وكان عندهم نفس النظرة بنفس الفكرة.
متبصش كتير في عينين الميت، لانك هتلاقيه بيبصلك.

هتقدر تعيش بالنظرة دي؟ اشك!

******************************************************
لو مش قد انك تبص في عينين الحقيقة، اوعي تجرب،
لأنك لو مش قدها، مش هترتاح...

التفسير السوداوي لجرائم التحرش الاخيرة

من فترة طويلة، وانا بفكر في الموضوع ده وعاملي حالة هوس : موضوع العنف الجنسي في مصر، والموضوع يهمني بوصفي - كأنثي- بقيت هدف للعنف الجنسي سواء اللفظي، او بالتحرش او حتي بالإغتصاب.

طيب، من فترة طويلة اصلاً ومصر عندها بعض الاوبئة الثقافية المتعلقة بوضعية الفئات الغير ممكنة empowered وخلوني استعمل المصطلح ده لاسباب هتوضح بعدين، والفئات الغير ممكنة في مصر مش بس الستات علي فكرة، دي بتشمل الستات، الاطفال، عند مستويات معينة المصريين المسيحيين، وعند مستويات تانية المرأة المعيلة ...في الواقع الفئات الغير ممكنة في مصر فئة وساعة جداً، لدرجة اني مبقيتش عارفة مين الفئات الممكنة أصلاً.

من البداية اسمحولي استخدم كمان مصطلح "العنف الجنسي"............

*** التحرش لفظي او باللمس، والاغتصاب: هل هو ظاهرة جديدة؟ يعني اول مرة نشوفها في المظاهرات؟ ولا هي ظاهرة متجددة؟

1- من فترة ليست بالقصيرة، واحنا بنسمع عن حوادث التحرش بالمتظاهرات، في الواقع هي بتتعدي حوادث التحرش وبقيت بتدخل في نطاق الاغتصاب الجماعي، بمعني ان مجموعات تتعدي ال50 شخص بتتلم في شكل دايرة علي بنت ، كل 50 شخص (مثلاُ لان الشهادات بتأكد ان العدد كان اكبر بكتير ) علي بنت واحده بس، وبعد كده تبتدي الحفلة، بداية من اللمس/ التحرش، ولم يتوقف الموضوع عند الانتهاك/ الاغتصاب.!!

خليني افكركم بواقعة اغتصاب الصحفية لارا لوجان يوم جمعة التنحي، 

وده رابط الخبر: 

 التحرش بالصحفية لارا لوجان يوم جمعة التنحي

من فترة برضه مش قصيرة واحنا بنسمع عن حوادث تحرش (فردية)  برضه في المليونيات، يمكن بسبب الزحمة، طيب وماذا عن حوادث التحرش (الفردية) في الاشتباكات، والمقصود بفردية، ان المتحرش فرد واحد بس.!! اول مرة كنت اختبر هذا القرف الصادم في احداث مجلس الوزرا ديسمبر 2011، ان فيه بنات كتير علي خطوط الاشتباكات الاولي قالوا انهم اتعرضوا للتحرش، وان التحرش حصل بسرعه وهم كانوا في حالة صدمة ان المتظاهرين بيشتبكوا، والجيش بيضرب رصاص، وفيه حدا واقف بيتحرش!!!

2- درجة حدة وعنف حوادث التحرش زادت، وخليني افكركم بواقعة التحرش الجماعي اللي اتعرضت لها صحفيتين في 2012: الصحفية البريطانية ناتاشا سميث اللي اتعرضت للحادثة دي يوم اعلان نتيجة انتخابات الرئاسة - لاحظوا ان الميدان كان مليان شباب ثوري طاهر اغلبه من ذوي الاتجاهات الاسلامية انصار مرسي - ، والواقعة التانيه صحفية قناة فرانس 24 سونيا درديري وهي بتغطي احداث احد المليونيات، طبعاً الواقعة كانت علي الهواء مباشرة، قمة القرف والمسخرة!!

لينك الخبر عن    ناتاشا سميث  

 وده بتاع   سونيا درديري مذيعة فرانس 24

4- فيه واقعة تحرش بمسيرة نسائية في ميدان طلعت حرب، المسيرة دي كانت منطلقة للتنديد بحوادث التحرش والاغتصاب اللي زادت حدتها في المجتمع، ماشي... هنا المتحرشين كانوا رايحين يتحرشوا مخصوص بمسيرة لرفض التحرش !! مسخرة!

4- تجلت قمة حدة وشراسة العنف في الواقعة الأليمة اللي حدثت في اثناء اشتباكات محمد محمود 3، واللي كانت الضحيتين فيها ياسمين وهانيا، اللي حكوا وقائع صادمة لأبعد حدود، عن وجود مجموعات قامت بالتحرش بيهم واصطيادهم اثناء القاء قنابل غاز في الميدان، شهادات ياسمين وهانيا ممكن تشوفوها علي موقع نظرة للدراسات النسوية وممكن احطلكم اللينك في اخر التدوينة. 

5- يوم 25 يناير 2013 كان يوم اسود و كارثي بكل ما تحمله الكلمة من معاني، حوادث تحرش ممنهجة ومنظمة وفي أكثر من مكان، كأن الناس متفقة علي ان ده يحصل، التحرش بمسيرة نسائية في ميدان طلعت حرب، تاني، ده غير الحفلات اللي اتعملت في ميدان التحرير... الجديد هنا ان المتحرشين كان عندهم هدف، اولاً: نزع ثياب المتظاهرات، تقليع هدوم مش لمس وبس، أو الحاق الحد الأٌصي من الأذي بالبنات اللي تم التحرش بيهم، مش بتكلم عن اغتصاب عنيف، لا بتكلم عن انتهاك بألات حادة ووجود اسلحة مع المجموعات المتحرشة، ودي كانت النقطة اللي انطقت منها فكرة ان التحرش في ميدان التحرير هو غالباً "ممنهج وبرعاية النظام السياسي".

طيب ممكن تديني شوية دماغك وعقلك وتطول بالك عليا؟ معلش انا عارفة اني بتكلم كتير: ...................

تعالي نرجع بالظاهرة لبعض حوادث التحرش الشهيرة، زي اغلب وقائع التحرش اللي كانت بتحصل في الاعياد، ومن أهمهم طبعاً واقعة تحرش طلعت حرب الشهيرة جداً لما دينا رقصت بالبنطلون الجينز وقالك اصل الشباب تعبان، والي اخر هذا الهبل.... 

ليه بقول هبل يا سيدي؟ علشان من الواضح أن واقع التحرش الجماعي في مصر ابعد واعمق من كده بكتيييييييييييييير، 

شوف دي كده: قصة حكاها الاستاذ شادي لويس بطرس عن الظهور الاول لحوادث التحرش الجنسي الجماعي ووفي العيد برضه:

شادي لويس بيحكي عن واقعة تحرش ، وفي مدينة نصر، وطبقاً للمكتوب، المجموعات منظمة والفعل بيتضمن بشكل اساسي اهانة معنوية وبدنية للضحية..اللي غالباً بتكون ست، واحياناً بتكون راجل،

ده لينك شهادة شادي علي فيس بوك:

شهادة شادي لويس عن وقائع تحرش جنسي في التسعينات

طيب فاكرين حوادث التحرش الجماعي اللي كانت بتحصل وسط تشجيع المنتخب الوطني في ماتشات الكورة؟ متهيألي دي مكنش ليها علاقة لا بالسياسة ولا بالنيلة، صح؟

********

التحليل بقي، علشان الناس اللي اتخنقت من الكلام الكتير:

انت بتتعامل مع جريمة التحرش والاغتصاب في مصر علي انها جريمة "جنس ذو طابع عنيف"، بإعتقادي لأ، هي عنف ذو طابع جنسي، يعني الاجرام مش بالبحث عن جنس او افراغ شهوة جنسية، لا حضرتك، ده افراغ طاقة عنف وتدمير، وبتاخد طابع جنسي او منحي جنسي، لأسباب كتير من ابسطها علي الاطلاق ان الجنس عندنا تابو...موضوع محرم، محدش بيتكلم فيه انبابلك، بس كلنا بنلمح بيه، في المدرسة المدرسين بتوع العلوم مش بيشرحوه ، بيسيبوا العيال لخيالهم، او لكتب بير السلم، او للانترنت مؤخراً... بقي الاخر دايماً ذو طابع جنسي، الخيال دايماً متوجه ليه لانه قدس الاقداس اللي محدش بيجيب سيرته، لا في الصحيان ولا في النوم.

غير كده، التراث الثقافي اللي احنا بنتعامل بيه وعايشين فيه تراث يعرف فكرة القهر الجنسي للاخر، او للفئة اللي بتتهزم او قهر جنسي علي سبيل كسر العدو.... نظرية اغتصاب حريم العدو المنهزم واحياناً اغتصاب رجاله.

يعني انا بغتصبك علشان اكسرك/ اثبت اني انتصرت عليك/ او اعلم عليك، بالبلدي..... دي يا سيدي الخلفية الثقافية اللي عندك، ودي اللي بتبرر الشتيمة بشرف الام، والشتائم المخلة بالشرف.

انقل علي مستوي معين في التعامل، مستوي القهر والجهل والاحباط ومعاداة المجتمع: بما اننا مجتمع كاره نفسه ومعقد زي ما حضراتكم عارفين وشايفين، فالطبيعي للغاية إن منافذ تفريغ شحنات الكراهية والاحباط والقهر بتبقي علي الفئات الاقل حظ في التمكين، او الفئات الغلبانة... عيال صغيرة/ ناس ضعيفة/ او ستات، فانت بتتعامل مع المجموعات المعادية للمجتمع، واللي بتدور علي منفذ لكسر تقاليد وقيود ونظم المجتمع اللي قاهرها، فبتطلع كبتها وقهرها في صورة عنف "ذو طابع جنسي" علي الستات اللي بيكونوا غالباً من طبقة أعلي...يعني البنات اللي بيروحوا يتفرجوا علي ماتشات الكورة، او اللي بيتفسحوا في اماكن رأسمالية زي المولات

مركز معايا، اقف عن الحتة دي واوعي تسيبها....ركز كويس....كويس قوي...

تغيير وجهة العنف الجنسي والتحكم في عصابات التحرش: 

المعطيات: فئات مهمشة ذات نزعات عنيفة، انفلات امني عنيف، ونظام سياسي زهق من المعارضة.

المطلوب: تفسير اشكالية التحرش الجماعي بالمتظاهرات/ او المشاركات في فاعليات التظاهرات.

البرهان:

البرهان بكل بساطة: انت مش محتاج اكتر من التحريض مع القليل من الاندساس!!!

قول يا سيدي ان المتظاهرات اللي بينزلوا الميدان شرا.....يط، وهتلاقي الف من يعمل الواجب معاهم.

الخطاب الاجتماعي في مصر اصلاً بيتعامل مع ضحية التحرش او الاغتصاب علي اساس ان هي المسئولة عن اللي حصل لها، فما بالك لو ان الضحية دي بالذات هي من المعسكر المضاد/ المقابل؟ دي تبقي احسن فرصه ليك علشان تطبق منطق : 

fuck the enemy ولامؤاخذة في الكلمة !

المتحرشين الجماعيين، الخارجين من سيطرة الرقابة الاجتماعية موجودين، والنظام كل اللي بيعمله انه بيستغلهم،

مش بيخلقهم!!!

كل اللي بيعمله النظام السياسي انه بيوجه نظر المجموعات دي، إما من خلال دائرة معارف ومصالح مع بلطجية العالم السفلي اللي هم اصلاً من رواد التحرش الجماعي، يعني ينكزهم بفلوس او حشيش او ترامادول، وهو هنا بيتعامل مع المتحرش والمغتصب اللي عمل كده وبيعمله بالفعل....

او: انه بيحرض ضد المتظاهرات في الميديا بتاعته، لما يقول: المتظاهرين اللي موقفين عجلة التنمية هم اللي بينزلوا ستاتهم لاماكن عارفين ان فيها تحرش، علشان هم شرا..يط وبيحبوا التحرش، وفي الاخر يرجعوا يعيطوا، وهنا الميديا بتخاطب الكثير والكثير من الاشخاص اللي جواهم مغتصب مستني بس الفرصة والشرعية للظهور، فبيقوم ياخد فرصته بشكل شرعي من وجهة نظرة مع البنات اللي نازلين "علشان يتعمل فيهم كده" .

انا مش بخاف من اللي النظام مأجرهم،

بس بترعب من اللي جواه مغتصب ومستني الفرصة، ومفيش رادع.!!! وهو ده المشكلة الحقيقية، لان في اقرب فرصة هتلاقي الاف المتحرشين، مش بيخافوا، وبيحركهم طاقة سخط وغضب وكبت عالية، وفي نفس الوقت مش هيفرق ، ولا هيترفق...

النظام وبلطجيته، ممكن بيلعب دور التوجيه، بس من غير نظام ولا بلطجية انت عندي بلاوي بما فيه الكفاية، والبلاوي دي ممكن تمارس العنف ذو الطابع الجنسي.

القاء النشطاء المسئولية كاملة علي عاتق النظام السياسي، بأنه المسئول المباشر انه بيجيب البلطجية وبيدفعلهم، من وجهة نظري مع احترامي للجميع هو تفسير ميتافيزيقي، زي ما بترمي كل ظاهرة انت مش فاهمها علي الطبيعة، او علي الارواح الشريرة زي ما كان الناس زمان بيعملوا، ده بدل ما تتعب دماغك بوجود احتمالات تانية تفكر فيها.

النظام السياسي مسئول، بشكل مادي او أدبي، وبكررها تاني ومش بنكرها،

لكن حقيقة الامر ان فيه تحت الارض وورا الكواليس اللي موجود خارج سيطرة النظام السياسي الضعيف اصلاً، وانا بقول لك وعلي مسئوليتي، لو مفيش نظام هيحرض، برضه حوادث العنف الجنسي هتفضل مستمرة وموجودة لأن منبعها موجود.

النظام بيحرض ضد المتظاهرات، وبيسيب الباقي علي ملوك العالم السفلي والساكنين في الجحور،

النظام مسئول عن خلق الاف المحبطين والابقاء علي حالة احباطهم،

النظام مسئول لانه بيسفه من قيمة المرأة وبيحقر منها،

النظام بيدفع...بيزق...بيستغل وضع موجود، مش بيخلق وضع جديد

والنظام كمان مسئول انه بيحرك البلطجية في وقائع كتير، أحداث طلعت حرب 1، 2، احداث محمد محمود ، بجانب التحريض المستمر ضد المتظاهرات، 

بس مشكلتي الحقيقية ان لو النظام غار في داهية، حوادث التحرش الجماعي العنيفة برضه هتفضل مستمرة.

وبالمناسبة، اي عنف تجاه المتحرشين هيخلق عنف اكتر منهم، يعني خلي بالك، انا وغيري هنضرب ونعور ونكهرب، بس هم كمان هيبقوا عنيفين اكتر.

عايز الحل: يمكن في تدوينة جايه...

روابط مهمه:

1- شهادة كل من ياسمين ، وهانيا (العظيمات اللي قدروا يسكروا حاجز الصمت)، من برنامج النهار:

2- التحرش بالمسيرة النسائية في ميدان طلعت حرب يوم 25 يناير: 

"التحرش" سلاح للقمع السياسى

3- بعض ردود الافعال علي حادث التحرش الجماعي الاول: موقعة طلعت حرب 2006
مصر "غاضبة" من حادثة التحرش الجنسي الجماعي بحق فتيات

4- من موقع مؤسسة المرأة الجديدة: 
ثماني شهادات عن الاعتداء الجنسي بالميادين

5-  قمة الابداع، مع لجنة حقوق الإنسان بمجلس الشوري، تحريض صريح وشرعية مباشرة للاغتصاب بالمتظاهرات في محيط التحرير:
«حقوق الإنسان بالشورى»: الفتاة المشاركة في المظاهرات «تُسهم في اغتصابها 100%»
6- وأخيراً: رأي شخصي انا شخصياً بدعمه 
من احمد البحار:

لأجلهم نحيا..... ولأجلهم ندون احياناً

24 يناير 2013:
مش دايماً لما بتخطط تكتب بتنجح، ومش دايماً لما بتخطط تحتفل، برضه الاحتفالية بتنجح..
التلقائيات افضل بكتير، حتي الثورات التلقائية ليها طعم مختلف.
تفتكر اول مرة، لبست يونيفورم المدرسة الابتدائي، ولا المدرسة الاعدادي (لو بنت طبعاً)... اول مرة!
اول مرة جربت اكلة جديدة وعجبتك، اول مرة شوفت فيلم وحبيته؟
اول مرة جربت تحب ؟ 
اول مرة نزلت عملت ثورة؟ 
ما علينا، مش هطول عليكم في الرومانسيات، علشان انا كمان مودي العالي ميلحقش ينزل.
النهارده في الذكري التانية لإحياء ثورة يناير... التي يقال لها مجيدة مع اني كنت فاكراها فريدة، وغيري بيحاول يسميها تفيده او فتحية.! في ذكري هذه الثورة اللي سميها زي ما تسميها، كل حاجه رجعت لنقطة الصفر!
مش عاجبك؟ طيب ومين قالك تعدي من جنب البومه؟ 
في مثل هذا اليوم من سنتين تقريباً، كنا عايشين في نفس الظروف، بس مكنش وقع مننا فوق الالف وردة...شباب زي الورد، لما تشوف صورهم تسأل نفسك، ليه هم ماتوا وانا فضلت عايش؟ 
علشان اشوف صوركم واتعذب بيها؟
شهدا الثورة هم الحاجه الوحيدة اللي مخليانا نكمل الثورة، لا مصر البهية ولا مصر القوية حتي، مشيوا جنبك صف بصف، انقذوك مرة، او ملحقتش انت تنقذهم مرة... بس انت عايز تاخد حقهم، حق الجندي اللي قاتل جنبك في المعركة، هو استشهد وانت اتكتب عليك تدخل معركة تانيه.
اللي بيقاتلوا في الحروب عارفين معني شرف السلاح والدفعة والحاجات دي، مش دايماً علي فكرة بيكون الوطن هو الغاية، احياناً بتكون فيه غايات اسمي.
طيب:
حق الشهداء ليس قميص عثمان كلمة حق يراد بها باطل، حق الشهداء هو الدافع الوحيد وراء استمرار سياسة ضرب الرأس بالجدار، ومصارعة الشلالات التي يقوم الثوار بها في كل ما يخوضونه من معارك.

هنكمل ثورة، لحد ما نجيب حقهم،
وهنفضل نكتب لحد ما نجيب حقهم...
اقول لكم اعتراف؟ انا كل ما بشوف صور حد من شهدا 25 تحديداً، بحس بذنب فظيع!! خصوصاً احمد بسيوني، وزياد بكير!

الاتنين كانوا فنانين، واحد مصور والتاني فنان جرافيك في الاوبرا، انا بحب الفن، وجربته شوية، وعارفه كويس احساس الفنان لما يعمل ثورة.
الاول داست عليه مدرعة بعد ما اتقنص من قناص وسخ،
والتاني فضل في المشرحة واتعرفوا علي جثته بعد ما الثورة خلصت..
وانا وغيري لسه عايشين بالذنب!!
مش بسيوني وزياد لوحدهم، غيرهم يا سيدي متعدش من ماسبيرو لمحمد محمود لبورسعيد، للعباسية، للإتحادية.... كتير.
حق الشهدا... وبس،
حقهم، نقطة ومن اول السطر!
تقول بقي ذنب، تقول قسم سلاح، قول اللي انت عايزه،
بس الحقيقة الوحيده الاكيدة في 25 يناير 2013، ان فيه واحد مات وحقه لسه ماجاش،
حقه كان حلم، والحلم ده لازم يتحقق، بغض النظر انا مؤمن بالحلم ده ولا لأ، او لسه مؤمن بيه ولا لأ، لانه كان حلمي انا كمان، ولا نسيتوا؟
انت حلمي يا شهيد، انت الحاجه الوحيدة اللي مخلياني مكمل...
صور بسيوني وكريم بنونه، واسلام، وزياد وسالي،
صور كريم خزام وهيكتور وحونيور، وجيكا وحسيني،
صورة الشهيد المجهول!!
يناير 2013: اهداء للشهداء، يا من لأجلهم نحيا،
ولمن لأجلهم مازلنا نحلم،
ولأجلهم، نمسك الاقلام لنكتب...
طوبي لكم 

ثورة الفياجرا

قبل أن تقراً: هذه التدوينة قليلة الادب وممكن تخدش حيائك لو حيائك يعني ناقح عليك،
فلو قريتها ورجعت تقول لي : ايه الكلام ده، او عيب، يبقي ذنبك علي جنبك، 
واديني حذرت......

ممنوع القراءة للناس اللي عامله نفسها مؤدبة..


بقالي فترة بتفرج علي اعلانات منشطات جنسية!! هار اسود، دي بقي بيتعمل لها اعلانات، وكتيييييييييييير، يا عم ولا اعلانات الرابسو والصابون!
بدأت هوجة الاعلانات بتاعة المنشطات من وقت قامت شركة فايزر بتحديد سعر قرص فياجرا الاصلي بعشرة جنيهات فقط! بدل ما كان تقريباً ب25 حاجه زي كده يعني، 10 جنيه بس علشان مفيش راجل يمشي فيكي يا بلد راسه محنيه ولا حاسس انه ولامؤاخذة خروف- طبعاً البلد فيها خرفان كتير شايلين سلاح وبيعملوا عروض عسكرية وبيضربوا الستات، ما علينا.
قرص فياجرا الاصلي بقي بعشرة جنيه بس، وحقن بيكربونات الصوديوم ناقسة في كل مستشفيات مصر بقالها كذا شهر، بيكربونات الصوديوم علي فكره الحقنة باتنين جنيه ونص,,,,,,,

عامة اعلانات المنشطات في مصر عندي معاها مشكلة نفسية انها شديدة الفجاجة، واللي مش عاجبه كلامي يبقي يتفرج علي الاعلانات بتاعتها، شئ قمة الفجاجة وانتهاك ادمية الانسان! حقيقي مجتمع شايف الرجولة القدرة علي اداء الديفوار الزوجي، اهم حاجه النص ساعة بتاعة يوم الخميس بالليل، والراجل يتأكد انه بيعرف!
سؤال خبيث، هي اشمعني دي الحاجه الوحيدة اللي الراجل بيبقي علي طول عايز يتأكد انه بيعرف يعملها؟ 

برضه ما علينا، تقريباً انا رصدت 3 انواع منشطات جنسية بتتباع في الصيدليات واعلانتهم مغرقة التلفزيون والراديو والشارع، وباسعار نسبيا في متناول يد ال....ولامؤاخذة الراجل !

طيب اللي مجنن اهلي بقي
، منين الفياجرا ترخص، والبيبسي سعره يعلي، يا كفره؟
البيبسي ليه ؟
علي فكرة، اسعار البيرة والسجاير كمان ارتفعت، وانا رغم اني لا بشرب بيرة ولا سجاير، الا اني مستغربة ومعترضه علي رفع اسعارهم! طبعاً، انا البيبسي ده مزاجي، اجي اطلب اعدل دماغي واسيب دماغ باقي الناس تخرب ؟ (ابتسامة شريرة خبيثة).!
طيب تعالوا نفكر بمنطق تاني، ان النخبة الجديدة، اللي عاملة نفسها اسلامية وحط تحت الكلمة دي ميت خط،  اكيد، اللي مش بتهتم غير بالحريم لبسوا ايه قلعوا ايه هببوا ايه، وعايزين يجوزوا البنت وهي عندها 9 سنين ومش عاجبهم قانون التحرش، وشايفين السافرات كفرة وكدزة يعني، طبيعي يهتموا يخلوا الفياجرا في متناول يد الجميع، علشان يطفوا رغابتهم اللي مبتهداش،
وطبيعي ان النخبة الجديدة العاشقة للجنس والساعية وراء المنشطات، هي نخبة متدينة تفضل البحث عن اطار شرعي لتفريغ الرغبة، حتي لو هيناموا مع بنات عندهم 9 سنين، بما لا خالف شرع الله، النخبة دي لا بتدخن ولا بتشرب خمور، وبتقاطع البيبسي لانه طبعاً منتج اسرائيلي، وبالنسبه لهم البيرة والسجاير دي بتاعة العيال الكفرة ولاد الوسخة اليساريين والليبراليين العلمانيين الفكرة!
يبقي انتم معترضين علي رفع سعر البيرة والبيبسي والسجاير ليه؟
سعر السجاير ارتفع بنسبة 150%، وتلات تربع الشعب بيدخن، لو سمحت متبقاش فج في تأييدك للقرارات لدرجة انك تقول ان دي وسيلة نافعة لاقناع الشعب ان التدخين مضر جداً بالصحة والجيب، البيرة الصراحة ماليش فيها، بس يعني جت علي دي، فيه ناس بتشرب، بس متهيألي اللي بيضربوا سجاير اكتر، ولا ايه؟
ما علينا برضه، 
طيب مش السجاير والبيبسي والبيرة بس اللي ولعت، شوف ايه ارتفع سعره تاني: 

قائة باسعار السلع والخدمات التي خضعت للزيادة


السؤال بقي اللي انت ممكن تسألة لما تشوف الضرايب الغريبة والارتفاعات الغريبة دي، هو: هو نزل الزيادات دي ليه؟ 
بتفكرني بالضرايب الغريبة اللي كان بيفرضها الحكام الاجانب علي مصر علشان يلموا بيها فلوس (ابتسامة شريرة خبيثة تانيه)، يعني هو اخضع كل حاجه في حياتك لزيادة ليس ليها اي مبرر او ليها مبرر هو بس اللي عارفه.
الفكرة ان الكهربا كمان زادت، والدعم بدأ يترفع عن البنزين، يعني هو عمال يزنق فيك يزنق فيك يزنق فيك، وبعدين يستغرب لما انت تنزل تعترض! طيب حاسب علي محسوسات الشعب يا اخي في الزروف الاقتصادية المنيلة بستين نيلة دي، دي اليونان ولعت بسبب سياسات التقشف، تقوم انت تقشفها علي شعبك اللي عايش في تقشف اساساً!! 
طيب ما تقشفها علي جماعتك يا ريس، ولا هم جماعة الامر بالمعروف واحنا جماعة الامر بالمنكر؟
طيب انا ايه اللي مضايقني في رفع سعر الكهربا ولا الانبابيب ولا اي حاجه، هي مش الفياجرا رخصت؟ والعلبة الذهبية في متناول يد المواطن؟
بلاها الكهربا، والبوتاجاز، والتعليم، وخلينا نظيط ونقضيها عط ، وطله بما لا يخالف شرع الله.
بس والنبي ابقوا قولولنا المخدرات هتغلي امتي.
اصلاً احنا عملنا ثورة علشان الفياجرا ترخص،
وبيكاربونات الصوديوم تختفي من المستشفيات.
يلا مش مهم، بس والنبي في الثورة الجايه اوعي حد ييجي جنب شيكولاته جالاكسي ولا كيت كات.

هل أتاكم حديث الشهداء ؟

الثلاثاء، 9 أكتوبر 2012:
عام بالتمام والكمال عدي علي مذبحة ماسبيرو ، مش ناوية اكتب عن ذكرياتي مع اليوم، مش ناوية أكتب تأملات شخصية، بس ناوية افتح كشف الحساب، لأن أكتر من كده هو رثائيات شخصية ما تهمش حد غيري، بس في البداية هحيلكم لكام حاجه ممكن تفكركم باليوم:
شهادات ماسبيرو
وهي مجموعة شهادات لأفراد تواجدوا في محيط منطقة ماسبيرو- التحرير- رمسيس في نفس توقيت المذبحة التي بدأت مع المسيرة السلمية للأٌباط من دوران شبرا، ولم تنتهي عند مستشفي القبطي في رمسيس.
شهادتي مسجلة بإسم: شهادة ساره أحمد فؤاد، مش هتلاقوها انجاز كبير وسط الشهادات المتينة المذكورة، بس ممكن تاخدوا جولة سريعة علشان تفتكروا المذبحة بالضبط حصلت إزاي...
شهادة ساره احمد فؤاد

سيبكم بقي من طوفان الذكريات، وخلينا نبتدي كشف الحساب: 

1- ألام المسيحيين في مصر:
بعد عام من مذبحة ماسبيرو، هل تغير الوضع كثيراً بالنسبة للمسيحيين: طبعاً لأ، الوضع بقي أسوأ، كل مدي الوضع بيسوء زيادة، كل ما تحصل مشكلة يقوللك هجر المسيحيين واخلص منهم، كل ما تحصل حكاية يقول لك لازم المسيحيين يطلعوا يعتذروا، وحوار الاساءة للرسول مكنش خافي علي حد......
بعد سنة من مذبحة ماسبيرو، لسه المسيحيين المصريين هم اول ناس بنضحي بيهم في اللعبة، وشباب المسيحيين يا عيني حيران بين جيل الاباء المحافظ لدرجة الاستكانة، وجيل الشباب المتمرد لدرجة الثورة، بس هتروح فين ولا فين يا حبيبي، انت في الاخر مالكش دية، هتندهس تحت الدبابة وهيقولوا عليم نزلت تضرب الجيش،وده ينقلنا للنقطة التالية....

2- ماسبيرو: آله الكذب عند المصريين المحدثين:
اتذكر يوم أحداث ماسبيرو ما بثته القناة الأولي من التلفزيون المصري عن المسيحيين اللي نزلوا يضربوا الجيش .....فاصل من العبثية الغير تقليدية والتي اعتاد التلفزيون المصري علي اتحافنا بها، بس الكوميدي بقي مش العبثي، إن الموضوع عدي ودي !!!
يعني المذيعة كانت متوترة، والاعصاب كانت مشدودة، ونسي الجميع، أو تناسوا، إن المذيعة بنت ال................نظام اعلنت ان المسيحيين نزلوا يضربوا الجيش قبل ما يحصل اشتباكات أصلاً،
يا عم ده حتي الناس اللي نزلت علشان تحمي الجيش اكتشفت ان الجيش بدأ يضرب في المتظاهرين، فشوية منهم راحوا يدافعوا عن المتظاهرين!!! طيب هل الست رشا مجدي اتحاسبت ؟ حد سأل مسئولين ماسبيرو عن الكلام اللي اتقال واتذاع وسمعه 80 مليون مواطن؟ طيب لو حصلت بعد كده حوادث طائفية ضد المسيحيين بحجة أنهم بيقتلوا الجيش، هيبقي دمهم في رقبة مين ؟
بلا نيلة، كان حد حل مشكلة "الخلية الصربية" اياها.!!!!

3- كيف مات من مات، جيش يفقد اعصابه، وقناصة، وأشياء أخري:
طيب احنا مش هنفتح قصة "فين الدبابة، ومين اللي سرقها، وإيه العبارة".... الدبابة كان بيسوقها عسكري، عسكري فقد اعصابه في ظل ظروف اشتباكات مدنية مدنية بحته... طيب مش هتفلسف وهتكلم عن تدريبات ضبط النفس اللي بتتعمل المفروض لشكل دوري للعسكرين في إطار تحسين أداء الجيوش لو حصلت حروب ...مش هتفلسف في النقطة دي، ومش هتكلم في إن دي جريمة اتعملت ومحدش اتحاسب عليها، بس كالمعتاد هاصطاد في المية العكره،
محدش خد باله إن مينا دانيال اتقتل برصاص قناصة؟ الرصاصة اللي دخلت وطلعت من جثمان الشهيد، مضروبة من مسافة بعيدة والدليل علي كده انها ماستقرتش!!!
محدش يسألني تاني فين الدبابة، انا عايزة اعرف فين القناصة ؟ مين اللي قنصنا، مين اللي قتلنا، وإيه العبارة؟

4- شارع رمسيس- مستشفي القبطي: العبثية مستمرة:
المسألة لم تتوقف عند حدود: الحق ياض المسيحيين الكفره بيضربوا الجيش، لاااااااااااا، دي جحافل الدفاع عن الاسلام العظيمة احتلت شوارع وسط البلد ومتعرفش دول محطوطين في الدرج مثلاً بيطلعوا بالتليفون! ما علينا ،
بعد ما الاقباط المجرمين الكفره قتلوا الجيش وبعد ما علاء عبد الفتاح سرق المدرعة، وبعد ما طلعنا نجري من التحرير والجيش بيضرب علينا نار ، وطلع المصابين والشهداء علي مستشفي القبطي اللي مكانش فيها لا مشرحة ولا دكاتره ولا اسعافات كافية، اكتمل المشهد ا أكتوبر لعبثي بجحافل المتدينين تمزق الانجيل وتهتف: النصاري فين الاسلام اهو، ومولتوف ينضرب علي مستشفي القبطي وحجاره وتمشي في الشارع تتسأل انت مسلم ولا مسيحي ؟ طيب لو حظك العاثر خلاك تقول انت مسيحي، كنت هتصلب مثلاً ولا تتعلق علي عمود نور في وسط البلد؟ 
في عز المسخرة بنتجاهل ان يوم أحداث ماسبيرو حدث تحريض طائفي عنيف وممنهج ضد المسيحيين، في إطار استكمال سيناريو المسيحيين اللي ضربوا الجيش، وإن التحريض الطائفي ده خرج من الدرج علي إيد ناس النظام اللي لسه مسقطش كل ما بيتزنق بيطلعهم، سواء سلفيين جهاديين مخبرين لابسين عمم وبدقون، ما تفرقش، بس اللي يفرق اللي حصل في الشارع.
بس ايه الهبل اللي انا بحكيه ده، اذا كان التحقيق ما اتفتحش في اللي مات ولا في الدبابة اللي دهست، ولا القناصة، هيفتحوا تحقيق في مظاهرات خرجت تهتف ضد المسيحيين اللي ضربوا الجيش ؟
انا كدابة !!! طبعا، حتي راجعوا شهادة حسام بهجت شخصية من أكثر الشخصيات احتراماً وحيادية وحكت الكلام ده بالتفصيل.

5- الحقيقة المرة: هل يعيد التدوين ما اضاعه الرصاص:
بنكتب، ونفتكر، ونعذب نفسنا، وننزل الشارع، ونعمل فعاليات، رغم أن ما اُخذ بالمدرعة لا يعود إلا بالقصاص، لكن الامل في العدالة والقصاص حلم، كل مرة بننزل نمجد في أسماء الشهدا كأننا بنعتذر عن اننا سيبناهم يموتوا، كأننا بنقول، احنا اسفين يا شهيد، ومش ناسيين حقك، بس يا تري هل فعلاً احنا مقتنعين بالكلام ده، ولا بنتخيل اننا بنعمل اللي علينا،
طيب ايه اكتر من كده ممكن نعمله ؟ الاصرار- الاستمرار في المطالبة بالحق..
طول ما انت فاكر، مفيش حاجه هتضيع، اقل واجب الاجيال القادمة علشان يعرفوا مين كان بيدور علي حقه، ومين غطس في الدم وشرب منه وقال هل من مزيد...
لو اضعف الايمان بس اننا نقتكر، ما ننساش، نفضل نبص في عين القاتل ونقول له ايوه انت قتلتني وانا مش ناسي، نفضل نفكره بالجريمة، بس خليك شوكه في زوره، يمكن يتخنق بالشوكة دي.
انا عندي أمل، للأسف لسه عندي امل، بضحك علي نفسي وبقول بكره نجيب حقهم، يمكن....
يمكن!!!

الثلاثاء 9 أكتوبر 2012، يوم التدوين في ذكري أحداث ماسبيرو...

اسيبكم مع شوية فيديوهات ممتعة من واقع أحداث ماسبيرو.....

1- التلفزيون المصري يحرض علي أالاقباط: الحقوا الاقباط بيضربوا الجيش ....

 2- حسام بهجت مع يسري فودة عن أحداث ماسبيرو:

3- فيديوهات كتير لمشاهد الدهس قررت اني مش هنزل منهم ولا فيديو، اليوتيوب مليان........ بس انا مش هقدر اشوف، اسفة!!



4- وأخر فيديو: ليه الثورة جميلة وحلوة وانت معايا : 

5-الدولة تحرض علي العنف الطائفي: تقرير المبادرة المصرية